Mediat serbe provokojnë sërish kur po mbushet viti i masakrës në “Lagjen e Trimave” në Kumanovë.
Tabloidi serb Kurir, ka publikuar një shkrim ku thotë se citon pikërisht CIA-n amerikane, ku sipas saj, ekziston një plan për të ndërtuar një aleancë panortodokse antishqiptare që të mos lejojë shtrirjen e akteve të armatosura si ai i Kumanovës.
Kurir thekson se “Nëse Shtetet e Bashkuara pas sulmeve në Kumanovë të vazhdojë të mbështesin fuqishëm shqiptarët, kjo mund të sjellë formimin e Aleancës Ortodokse Ballkanike ndërmjet Serbisë, Greqisë, Bullgarisë dhe Maqedonisë”.
Kurir thekson më tej në shkrimin e tij, se këto pjesë janë marrë nga një raport i CIA-s, por nuk e bën të ditur asnjë referim.
Sipas tabloidit serb, “SHBA dhe BE po vazhdojnë të përkrahin në mënyrë të heshtur ringjalljen e Shqipërisë së Madhe dhe ndoshta kjo mund të sjellë edhe Luftën e Tretë Ballkanike.
Duket si rastësi, por edhe një vit më parë, pikërisht në këtë kohë, mediat serbe paralajmëruan trazira pikërisht në Maqedoni dhe po “rastësisht” në maj forcat maqedonase kryen operacionin skandaloz në “Lagjen e Trimave”.
Sipas Kurir, analistët e CIA-s i kanë propozuar autoriteteve amerikane një qasje më të balancuar në Ballkan.
“Analistët amerikanë shkruajnë se vendet ballkanike, territoret e të cilave preken nga projekti i Shqipërisë së Madhe nuk do të rrinë duarkryq dhe të shikojnë se shqiptarët po u marrin territorin”, shkruan tabloidi serb duke iu referuar raportit dhe vazhdon:
“Për më tepër, ata, amerikanët, janë të bindur se në rast të një emergjence, serbët, grekët, bullgarët dhe maqedonasit do të bashkojne forcat në luftën kundër shqiptarëve. Dhe në këtë rast Ballkani do të bëhet një rajon si Lindja e Mesme, por që nuk do ishte në interest ë askujt, as dhe dhe të Shteteve të Bashkuara”.
Ndërkaq, duke bërë një opinion nga hiçi, Kurir ka intervistuar një ekspert, Gjorgje Vukadinoviq, tha se aleanca panortodokse është një reagim logjik në përpjekje për të krijuar një “Shqipërie të Madhe”.
“Në qoftë se aleanca ndodh, unë nuk besoj se Shtetet e Bashkuara do të mund të qetësojnë situatën e as shqiptarët e tyre të dashur. Serbia e ngriti këtë aleanca të ngjashme para Luftës së Dytë Botërore, kur u përplas me Turqinë”, thotë Vukadinoviq.
Përgatiti: Ylli Pata – /tesheshi.com/
