Sipas së përjavshmes New York Observer, kandidati republikan për president, senatori Rand Paul, është shprehur se ishte një “gabim” i madh që SHBA-të e detyruan me forcë Sadam Huseinin në 2003-shin ta lërë postin e tij.
Senatori ka thanë se lëvizja e SHBA-ve për ta rrëzuar presidentin irakian Sadam Husein mund ta ketë bërë Iranin “dy herë më të fortë se ç’ishte para luftës së Irakut”.
Rand Paul ka vijuar më tej, duke shtuar, “Huseini ishte fortifikata kundër Iranit”.
Në fjalën e tij në një aktivitet në Bruklin, ai po ashtu la të kuptohej se situata në Libi ishte përkeqësuar që kur Gadafi u shtrëngua ta dorëzonte pushtetin.
“Unë mendoj se ne e mbyllim me kaos sa herë që rrëzojmë një diktator shekullar,” ka shtuar Rand Paul.
Senatori në të njëjtën kohë ka kritikuar dhe Hillary Clinton-in, duke e cilësuar të pasuksesshme fushatën e saj në Lindjen e Mesme gjatë kohës që ajo qe sekretare e Shtetit.
“Lufta e Hillary-t në Libi ishte dhe është një katastrofë e plotë.”
“Tani që Gadafi nuk është më, vendi gjendet në luftë civile, ambasadori u vra, ambasada jonë ia mbathi … vendi është i ndarë, dhe një e treta e tij mbështet ISIS-in,” e ka mbyllur kritikën kandidati republikan për president.
