Situata e ndërlikuar politike në Maqedoni së fundi është komentuar edhe nga senatori republikan dhe ish-kandidat për president të SHBA-së, Xhon Mekejn. Sipas tij, për tejkalimin e ngërçit politik në këtë shtet nevojitet një angazhim më intensiv i faktorit ndërkombëtar, gjegjësisht të SHBA-së dhe BE-së.
“Është i nevojshëm angazhim më i madh dhe ndërmjetësim në këtë situatë mjaft dinamike dhe shpërthyese në Maqedoni. Në interes të askujt nuk është që të shpërbëhet Maqedonia. Jam i shqetësuar për Maqedoninë. Nuk parashikoj konflikt apo luftë, por them se tensioni është i lartë dhe situata po del prej kontrollit, dhe kërkon më tepër angazhim të SHBA-së por edhe të BE-së”, ka thënë senatori amerikan Mekejn, në një intervistë për redaksinë serbe të “Zërit të Amerikës”.
Duke komentuar situatën në Ballkan, senatori Mekejn vlerëson se pas përparimit të madh pas konfliktit në vitin 1990, tani përsëri rriten tensionet dhe pasiguria në rajon, ndërsa shembull për këtë, ka thënë ai, është kriza në Maqedoni.
“Besoj se kjo është rezultat i mungesës së lidershipit evropian dhe amerikan. Kemi marrë pjesë në zgjidhjen e konfliktit të atjeshëm, kishte shumë jetë të humbura, por në vitet e fundit si duket kemi braktisur rajonin. Ky është një shembull se prezenca e SHBA-së është më se e nevojshme”, ka shtuar Mekejn. /tesheshi.com/
