Policia italiane sekuestroi 2 miliardë asete që I takonin grupit të fuqishëm mafioz, Ndrangheta. Asetet u sekuestruan në një seri operacionesh, e përfshijnë me qindra pika bastes të zotëruara nga Ndrangheta, që sipas ekspertëve, qëndron pas pjesës më të madhe të tregtisë së kokainës në Europë.
Policia lëshoi edhe 14 urdhëra arresti. Autoritetet thanë se kanë sekuestruar të paktën 1500 pika bastes, 82 faqe interneti për lloto, 45 kompani italiane dhe 11 firma të huaja, sikundër edhe një numër tjetër pronash.
Gjashtë nga kompanitë operonin në Maltë, dy në Spanjë, dy në Rumani dhe një në Austri.
Banda qarkullonte një sasi të pamatë parash të pista përmes përdorimit të llogarive të bixhozit për njerëz të ndryshëm.
Ndrangheta e ka qendrën në “gishtin” e Italisë që dominon tregtinë e kokainës në vend. Eshtë një nga organizatat më të mëdha mafioze në Itali, së bashku me sicilianen Cosa Nostra dhe napolitanen Camorra./tesheshi/
