Nga Blendi Gashi
Deputetët e partive opozitare sërish janë mbledhur para foltores së kryekuvendarit Kadri Veseli për të mos lejuar vazhdimin e seancës e cila është thirrur pa praninë e kryeministrit Mustafa i cili ndodhet në Nju Jork. Bllokimi i seancës është pjesë e strategjisë së opozitës për të kundërshtuar marrëveshjet e Brukselit, themelimin e Zajednicës, krahas peticionit që vijon të nënshkruhet nga qytetarët.
Pranë foltores së tij, vazhdojnë të qëndrojnë shefi i grupit parlamentar të Vetëvendosjes, Glauk Konjufca dhe shefja e grupit parlamentar të AAK-së Donika Kadaj-Bujupi të cilët po diskutojnë me Veselin.
Ndërsa, te foltorja kryesore e deputetëve po qëndrojnë deputetë të tjerë të opozitës, si Albin Kurti, Visar Ymeri etj, Ramush Haradinaj, Pal Lekaj.
Por, siç duket Kuvendi ka marrë masa në rast të përshkallëzimit të mundshëm të situatës ndërsa mbahet seanca e ndërprerë javën e kaluar nga sulmi me vezë në drejtim të kryeministrit Mustafa. Deputetëve pranë shisheve të ujit, këtë herë u janë vendosur gota plastike, në vend të gotave të qelqit që në seancën e parë, u “përdorën” nga deputetët jo në funksionin e duhur.
Në “seancën e vezëve”, si ka mbetur në terminologjin politike në Kosovë, seanca e ndërprerë e javës së kaluar, një deputet i LDK-së iu kundërpërgjigj vezëve me gotën e qelqit që kishte në tryezë. /tesheshi.com/
