Ishulli i Sazanit ka shënuar tashmë javën e parë të funksionimit si destinacion turistik, i cili nga treguesit paraprakë po jep rezultatet e para.
Drejtori i Agjencisë së Bregdetit, Auron Tare, ka instaluar një zyrë-çadër për të pritur dhe udhëhequr njerëzit që vijnë për të eksploruar ishullin, i cili gjithnjë ka shërbyer si një “hekur dhe beton” në mes të detit dhe jo një pjesë e mrekullueshme e natyrës që Zoti i ka falur shqiptarëve.
Ndërkohë që Korfuzi prej shekujsh, por edhe ishuj të tjerë grekë shfrytëzojnë të mirat që sjell industria e turizmit, Tare duket ka një “ëndërr” në sirtar që ta bëjë Sazanin: “Ischia”-n apo “Capri”-n. Veçse kjo do shumë kohë dhe kërkon strategji e vizion.
Prej një jave, qindra qytetarë vlonjatë dhe jo vetëm kanë vizituar Sazanin, i cili prej shumë vitesh ishte një zonë e ndaluar ushtarake. Mjete të shumta detare ankorohen çdo ditë në molin e ishullit dhe më pas vizitojnë zona të ndryshme të tij, gjithmonë nën shoqërimin e dy udhëheqësesh guide, të cilat u shpjegojnë turistëve, e sidomos të huajve, godinat ushtarake, pallatet, si dhe rrënojat e mjeteve lundruese, të cilat ndodhen në det.
Vizitorët, të cilët ishin në ishullin e Sazanit, u shfaqën të impresionuar nga ato që kishin parë në ishull, të cilat deri dje vetëm i kishin dëgjuar nëpërmjet emisioneve të ndryshme. Po ashtu kishte dhe vizitorë, të cilët kanë punuar kohë më parë në këte ishull dhe ktheheshin pas shumë vitesh me nostalgji.
Projekti për ishullin ishte prezantuar më herët nga kryeministri Rama, si një nga risitë e këtij sezoni turistik.
Drejtori i Agjencisë Kombëtare të Bregdetit, Auron Tare, i cili prej ditësh ndodhet në këtë ishull duke qëndruar në një çadër të improvizuar, tha se “tashmë ky ishull nuk do të jetë më tabu, por një tjetër destinacion për pushuesit vendas dhe të huaj”.
Ai u shpreh se, ky ishull nuk ka vende për të bërë plazh, por vetëm për t’i vizituar, ndërsa për çdo vizitor do të vihet në dispozicion një biletë me çmim shumë të lirë dhe të ardhurat e mbledhura do të përdoren vetëm për ishullin e Sazanit, për menaxhimin e zonës, për hapjen e qendrës së vizitorëve dhe për qendrën kërkimore shkencore, që synohet të ngrihet atje.
“Po punojmë për kuadrin ligjor dhe për rregulloren, që është hartuar dhe do të miratohet, sepse ne mendojmë se është shumë e rëndësishme, që ishulli të vetëfinancohet. Pra, të gjitha të ardhurat do t’i dedikohen vetëm ishullit, ku më pas të ardhurat do të përdoren për restaurimin, për hapjen e qendrës së vizitorëve dhe për qendrën kërkimore shkencore, që ne duam të themelojmë këtu, dhe për menaxhimin e zonës”, është shprehur Auron Tare./tesheshi.com/
