Organizata “Save the Children” ka filluar një fushatë globale “Çdo fëmijë ka nevojë”, pjesë e së cilës do të jetë edhe Kosova. Sipas kësaj organizate, miliona fëmijëve të varfër në botë është duke iu mohuar e drejta në shërbimet për t’u shpëtuar jetën për shkak të asaj se kush janë dhe ku ata jetojnë.
Kjo fushatë në Kosovë do të ketë për qëllim që fëmijët me aftësi të kufizuara të kenë qasje në shërbimet themelore cilësore dhe gjithëpërfshirëse.
Sipas hulumtimit të organizatës “Save the Children”, fëmijët me aftësi të kufizuara kanë më tepër gjasa të përjetojnë dhunë fizike, seksuale ose neglizhencë sesa bashkëmoshatarët e tyre pa aftësi të kufizuara.
“Është vlerësuar se rreth 150.000 njerëz në Kosovë kanë një lloj të aftësisë së kufizuar, dhe rreth gjysma mendohet të jenë fëmijë të moshës shkollore, duke hasur në mungesë të profesionistëve të trajnuar mirë dhe alokim të pamjaftueshëm të burimeve shtetërore. Përafërsisht, vetëm 10% e fëmijëve me aftësi të kufizuara përfitojnë nga shërbime cilësore duke përfshirë arsimin, shëndetësinë dhe shërbimet sociale”, thuhet në komunikatë. /tesheshi.com/
