Kryeministri Edi Rama pritet që të takohet sot në Bruksel me presidentin e SHBA-së, Donald Trump.
Një takim i cili, nëse ecën sipas parashikimit, do të jetë i pari pas një kohe të mbushur me helm dhe teori konspirative, që pas deklaratës së Edi Ramës gjatë fushatës elektorale në SHBA kur tha se Trump nuk do të jetë një president i denjë.
Takimi pritet të zhvillohet në orët e pasdites, pas samitit të udhëheqësve të shteteve anëtare të NATO-s, që nis në orën 11:00.
Në selinë e NATO-s, Rama pritet që të zhvillojë takime të veçanta edhe me kancelaren e Gjermanisë, Angela Merkel, me presidentin e Turqisë, Recep Tayyip Erdoğan, si dhe me mbretin e Belgjikës.
Takimet me Trump-in dhe Merkel-in, ka qenë vetë Rama që i ka paralajmëruar në rrjetet sociale.
“Dhe ju uroj një ditë të mbarë nga Brukseli, ku pas takimeve mbrëmë me Përfaqësuesen e Lartë të BE, Mogherini, dhe liderët e Ballkanit Perëndimor për perspektivën europianeve të vendeve tona, vijon sot takimi me Krerët e Shteteve dhe Qeverive të vendeve anëtare të NATO-s, me Presidentin Trump, Kancelaren Merkel, Mbretin e Belgjikës dhe personalitete të tjera,” shkruan Rama. /tesheshi.com/
