Ervin Salianji, deputet i PD-së, tha se përplasja që ndodhi dje në Kuvend kishte të bënte me të drejtën e fjalës, që mazhoranca i bëri opozitës. Salianji tha se veprimi i djeshëm i kryeparlamentarit për t´i mbyllur gojën opozitës nuk ka ndodhur kurrë më parë, ndërsa akuzoi Gramoz Ruçin se po e kthen Kuvendin shumë vite pas.
“Nuk ka ndodhur më parë që të ketë përplasje për të drejtën e fjalës. Mund të ketë pasur për tejkalim të kohës, por jo për të drejtën e fjalës. Shoku Gramoz e ka ngatërruar përiudhën dhe mendon se mund ti ndërpresë fjalën opozitës si para 30 viteve. Ne kemi kërkuar që si për çdo akt që kalon në Kuvend të kemi diskutime. Regjistrimet kanë ndodhur dhe Ruci i ka pranuar kërkesat e deputeteve, por deputetët e mazhorancës ishin të papërgatitur. Shtyrja e seancës u kërkua nga PS dhe LSI. Nuk ka skandal më të madh se të tentosh të mos lësh opozitën të flasë, kjo është e padrejtë”, tha Salianji në News 24.
Sipas tij, vendimi për të përjashtuar kreun e PD-së, Lulzim Basha, ishte porosi e Edi Ramës.
“Neni 46 i rregullores së Kuvendit thotë se çdo deputet që do të diskutojë për rendin e ditës duhet të regjistrohet në sekretari, dhe ne i kemi regjistruar dhe kemi ndjekur të gjitha hapat proçedurale. Unë mendoj se mund të jetë edhe një skenar i Ramës për ta degraduar akoma më shumë dhe për të hequr vëmendjen. Ishte porosi e Ramës dhe sapo nisi diskutimi, Rama tha thuaji që ka mbaruar”, tha Salianji. /tesheshi.com/
