Në Elbasan u shënua vrasja e radhës mbrëmjen e kësaj të marte.
Everest Çaka, 41 vjeç, u ekzekutua brenda në makinë, pranë të cilit qe dhe bashkëshortja, por e cila shpëtoi vetëm me një plagosje në dorë.
Njoftimi policer thotë se “rreth orës 20:10, në lagjen “Skënderbe”, Elbasan, në rrethana ende të paqarta është vrarë me armë zjarri në mjet shtetasi E.Ç, rreth 41 vjeç si dhe është plagosur në dorë bashkëshortja e tij shtetasja S.Ç., jashtë rrezikut për jetën.
Shërbimet e Policisë kanë shkuar menjëherë në vendngjarje dhe kanë rrethuar zonën.
Janë ngritur pika konrolli në hyrje – daljet në qytetin e Elbasanit dhe vijon kontrolli i zonës.
Grupi hetimor nën drejtimin e Prokurorisë ndodhet në vendngjarje dhe vijon puna për zbardhjen e plotë të shkakut dhe rrethanave të ngjarjes si dhe identifikimin e kapjen e autoritëve”.
Por a ka lidhje viktima me një sagë vrasjesh në Elbasan, ku shumë emra ndërlidhen me njëri-tjetrin.
Siç raporton Shqiptarja.com, Everest Çaka është djali i tezes së Ardit (Arjan) Spahiut. Ky i fundit është ekzekutuar me 8 plumba në Bruksel në nëntor 2020. Spahiu është vëllai i kunatit të Erion Alibej, i arrestuar nga prokuroria e Elbasanit si person i dyshuar për urdhërimin e organizimit të dy vrasjeve.
Erion Alibej, organizatori i dy vrasjeve që tronditën qytetin e Elbasanit, më 20 dhe 29 korrik, ka porositur vrasjen e Emiljano Ramazanit dhe shokut të tij, Regis Runaj në Elbasan. Uniformat blu e arrestuan më 18 shtator po në Elbasan. /tesheshi.com/
