Pothuajse pa shira dhe një i nxehtë i jashtëzakonshëm, kjo verë përgatitet të hyjë në histori. Temperaturat e larta të korrikut janë vetëm një pjesë e panoramës. Vera e sivjetme u duk se do të ishte e padurueshme që nga nisja e saj në fund të majit e në fillim të qershorit, kur vala e të nxehtit shkaktoi me qindra të vdekur në Indi dhe në Pakistan.
Por, ashtu si edhe nisi, sipas ekspertëve, ashtu edhe do të vazhdojë. Temperaturat e larta pritet të shoqërojnë gjithë ditët e kësaj vere, me ndonjë variacion të lehtë.
“Po përjetojmë një korrik gati anormal nga pikëvështrimi klimaterik”, shprehen ekspertët për median në vendin fqinj, Italinë, kushtet e motit në të cilën nuk ndryshojnë shumë nga vendi ynë. Dhe nuk ka asnjë ndryshim pothuajse si në jug ashtu edhe në veri.
Sipas statistikave të deritanishme, vera mund të jetë më e nxehta në 60 vjetët e fundit dhe nëse presim fundin e saj, mund të rezultojë edhe vera më e nxehtë e regjistruar. Jo vetëm për temperaturat e larta, por edhe për mungesën pothuajse të plotë të shirave që ka ulur edhe nivelin e lumenjve dhe depozitave energjetike, e ka shtuar alarmin për një krizë në sektorin e energjisë. /tesheshi/
