Rusia shkurton eksportet e naftës, Saudia prodhimin

Rusia do të ulë vullnetarisht eksportet e naftës me 500,000 fuçi në ditë në gusht, tha zëvendëskryeministri rus Alexander Novak, ndërsa Arabia Saudite do të ulë prodhimin në korrik dhe gusht për të stabilizuar çmimet.

Çmimi i naftës së papërpunuar ruse Urals ishte mesatarisht 55.28 dollarë për fuçi në qershor, nën kufirin e vendosur nga fuqitë perëndimore, njoftoi ministria e financave. Në të njëjtën periudhë të vitit të kaluar ishte 87.25 dollarë, thonë ata.

“Si pjesë e përpjekjeve për të ruajtur ekuilibrin në tregun e naftës, Rusia do të ulë vullnetarisht furnizimin e saj me naftë me 500,000 fuçi në ditë në gusht duke reduktuar eksportet në tregjet globale në atë sasi”, tha Novak.

Në mars, Rusia reduktoi vullnetarisht prodhimin me 500,000 fuçi në ditë në krahasim me mesataren e shkurtit, dhe më pas e zgjati vendimin deri në fund të vitit, shkruan agjencia ruse TASS.

Vendimi i ri i referohet eksportit, jo prodhimit, thekson e njëjta agjenci.

Rusia me humbje

Arabia Saudite ka vendosur të zgjasë vendimin për uljen e prodhimit të korrikut me një milion fuçi në ditë për një muaj, deri në fund të gushtit, njoftoi të hënën agjencia shtetërore e lajmeve SPA.

Prodhimi saudit do të arrijë në nëntë milionë fuçi në ditë në korrik dhe gusht.

Kreu i kompanisë ruse të energjisë Rosneft, Igor Sechin, tha në qershor se Rusia është me humbje në krahasim me vendet e tjera të OPEC+ pasi eksporton një pjesë më të vogël të naftës së prodhuar, kujton Reuters.

Disa vende të OPEC+ eksportojnë deri në 90 për qind të prodhimit të tyre, ndërsa Rusia eksporton vetëm gjysmën, tha Sechin, sipas Reuters.

Pas vendimit të dy eksportuesve kryesorë në botë, oferta globale do të reduktohet me një total prej 5.16 milionë fuçi në ditë, pasi do të vijojë nga marrëveshja aktuale e OPEC+ për të ulur furnizimin me 3.66 milionë fuçi në ditë, llogarit Reuters. /tesheshi.com/