Dorëheqja e kryeministrit të vendit, Viktor Ponta, pas një incidenti vdekjeprurës në një lokal nate, ku humbën jetën 32 persona, nuk i ka kënaqur rumunët, të cilët kanë vërshuar mbrëmë përsëri në rrugë.
Protestuesit e mbrëmshëm në rrugët e Bukureshtit dhe të qyteteve të tjera ishin më të shumtë se të një nate më parë, duke patur si kërkesë të tyre dhënien fund korrupsionit, e një ndryshim të thellë në qeverisje.
Me protestat ata kërkojnë nisjen e një reformimi të klasës politike e të administratës publike, që në këndvështrimin e tyre janë thellësisht të korruptuara.
Ata kanë hequr paralele me revolucionin e 1989-ës, duke e krahasuar luftën për liri asokohe me luftën për drejtësi në ditët e sotme.
Protestuesit kërkojnë njerëz të rinj, ndërsa revoltimi dallohet menjëherë. “Vrasës” ishte një prej thirrjeve të tyre.
Presidenti rumun, Klaus Johanis, është shprehur kështu për atë çka po ndodh në vend, “Kjo tragjedi preku nervin më të ndjeshëm të popullit. Indinjata e rumunëve është kthyer në një revoltë të vërtetë.”
Kryeministri Ponta do ta jepte dorëheqjen ditën e djeshme. Përmes një deklarate ai shpjegonte se do të qëndronte në detyrë gjer në formimin e një qeverie të re.
“Shpresoj që dorëheqja e qeverisë t’i kënaqë njerëzit që dolën në rrugë,” thuhej në njoftimin e dorëheqjes, çka nuk ka rezultuar të jetë ashtu, pasi protesta vazhdojnë.
Zgjedhjet e ardhshme parlamentare janë në dhjetorin e 2016-ës, por nëse dështon krijimi i një qeverie të re, mund të shkohet dhe në zgjedhje të parakohshme. /tesheshi.com/
