Vizita e presidentit egjiptian, Abdelfettah es-Sisit, në Britani, e cila ka nisur ditën e djeshme dhe është treditore, nuk është e mirëpritur atje për një pjesë të mirë të popullatës. Në kundërshtinë ndaj kësaj vizite bien në sy laburistët, që e kanë shprehur mospëlqimin me anë të shefit të tyre, Jeremy Corbyn-it.
Tallje me deklarimet e kryeministrit britanik, David Cameron, për inkurajimin e paqes dhe drejtësisë në Lindjen e Mesme, e ka quajtur këtë vizitë treditore Jeremy Corbyn.
I ashpër në qëndrimin e tij, lideri i laburistëve britanikë është shprehur përmes një deklarate të shkruar, ku thuhet se, “Thirrja në Britani sot nga David Cameron-i e presidentit egjiptian dhe e udhëheqësit të grushtit të shtetit, Abdelfettah es-Sisit, tregon përbuzjen për të drejtat njerëzore e demokratike, e kërcënon sigurinë kombëtare të Britanisë.”
“Mbështetja për regjimet diktatoriale në Lindjen e Mesme është një faktor kyç që nxit përhapjen e terrorizmit,” ka vijuar më tej në deklaratë Corbyn. “Në vend të shtrimit të tapetit të kuq për presidentin Sisi, kryeministri duhet të pezullojë eksportet e armëve për në Egjipt gjersa të kthehen të drejtat civile dhe demokratike.”
Krejt ndryshe, qeveria britanike e ka justifikuar vizitën me nevojën për të bashkëpunuar me Egjiptin në luftën kundër ekstremizmit dhe terrorizmit. Ajo e ka përshkruar vizitën si një mundësi për të zhvilluar një dialog të hapur e të çiltër. /tesheshi.com/
