Radio Televizioni Publik Shqiptar (RTSH) ka marrë vërejtje të konsiderueshme nga audienca, por së fundmi edhe autoriteti rregullator për përmbajtjen e mediave.
Shkas janë transmetimet e disahershme të këngëtares serbe Svetlana Razhnatoviç, e njohur ndryshe si Ceca. Kjo e fundit ishte bashkëshortja e ish-kriminelit të vrarë, Zhelko Razhnatoviç – Arkan, autor i krimeve të panumërta në Bosnje dhe Kosovë.
Këngëtarja 46-vjeçare, e njohur për gjuhën helmuese të urrejtjes në tekstet e saj, ka qenë mbështetëse e madhe e operacioneve ushtarake në Bosnje dhe Kosovë, duke kënduar në bazat ushtarake për t’u dhënë “zemër” ushtarëve.
Duke u shqetësuar për transmetimin e këtyre këngëve në Radio Televizionin Publik Shqiptar, Autoriteti i Medias Audiovizive (AMA), është shprehur se është e papranueshme që këngëtarja serbe të ketë hapësirë për transmetim në këtë televizion.
“Ceca ka qenë promovuese e krimeve në Bosnje dhe në Kosovë. Në këngët dhe deklaratat e saj të hershme, Ceca ka qenë frymëzuese e mizorive, ka qenë suport për veprimet çnjerëzor të ish bashkëshortit të saj, kriminelit të luftës, Arkanit, dhe grupeve militare e paramilitare serbe që ai i ka udhëhequr”.
RTSH-ja ka hapësirë transmetuese për pakicat etnike. Në kanalin TVSH 2, të shtunën ishin transmetuar disa këngë të Ceca-s, e cila pak muaj në parë qëndroi në një koncert në Mitrovicë, ku hodhi helmin e radhës me deklarata politike proserbe dhe antishqiptare. /tesheshi.com/
