Të dielën do të luhet e 37-ta përballje mes dy ish-numrave një të botës në tenisin e meshkujve, Roger Federer-it dhe Rafael Nadal-it.
Mes zvicerianit dhe spanjollit do të jetë ky takimi i tretë i këtij viti, me të parin që ka dalë fitues në dy përballjet e mëhershme.
Në Miami Open, Nadal e Federer kanë arritur në finale. Shumë më e lehtë ka qenë gjysmëfinalja për Nadal-in, që ka fituar 2-0 ndaj italianit Fognini. Krejt ndryshe ka ndodhur në gjysmëfinalen tjetër, ku Federer-it i është dashur të luftojë fort për të mposhtur australian Nick Kyrgios.
Një gjysmëfinale që i ka patur të tëra, e që është mbylllur 2-1 në favor të Federer-it.
Kjo ishte fitorja e 18-të gjatë këtij viti për zvicerianin, kundrejt vetëm një humbjeje. Sukses i pamenduar për një tenist që për gjashtë muaj të vitit të shkuar qëndroi jashtë fushave.
Federer e ka mposhtur Nadal-in në të dy takimet e 2017-s, në finalen e Australian Open-it dhe në Indian Wells Masters. /tesheshi.com/
