Gjysma e popullsisë online, tani hyn në Facebook të paktën një herë në muaj, që përbën një rritje të numrit të njerëzve përdorues të gjigandit të rrjeteve sociale. Ky numër është rritur me 13 për qind duke e ngjitur në 1.49 miliardë numrin e përdoruesve të Facebook, ose gjysma e 3 miliardë personave që vlerësohet se përbëjnë “popullsinë” e përdoruesve të internetit në të gjithë botën.
Nga këta përdorues më shumë se gjysma, saktësisht 65 për qind e tyre hyjnë në Facebook përditë.
Rritja e përdoruesve aktivë të përmuajshëm të rrjetit social është arsyeja kryesore e rritjes së fitimeve të kompanisë që për cerekun e dytë të këtij viti ka raportuar një shtim me 39 për qind të fitimit, në nivelin 4.04 miliardë dollarë.
Të ardhurat nga reklamat e telefonave celularë përbëjnë faktorin më të madh në fitime.
Në Shtetet e Bashkuara, sipas vetë kompanisë, njerëzit shpenzojnë një në pesë minuta për të parë Facebook-un në telefonat e tyre smart.
“Po i mbajnë njerëzit në grep”, thotë analistja Erna Alfred Liousas për BBC-në.
Por pavarësisht asaj që themeluesi i Facebook, Mark Zuckerberg e cilësoi një performancë të fuqishme, aksionet e kompanisë ranë me 3 për qind pas nxjerrjes së bilancit. Kjo rënie, sipas Zuckerberg reflekton koston e madhe për investime që po bën kompania duke ndërtuar qendra të mëdha serverash në mbarë botën. /tesheshi.com/
