Përfundoi me një jetëhumbje tragjike aventura alpinistike ku protagonist qe gazetari Alfred Lela. 
Ndoc Mulaj, specialist turizmi, humbi jetën pas një rrëzimi në malin e Munellës në Pukë. Ai u gjet i pajetë pas orë kërkimesh.
Bëhej fjalë për një ekip ku veç gazetarir Alfred Lela dhe të ndjerit Ndoc Mulaj, ishte dhe Ilir Shyti, inxhinier pyjesh, operatori Gisel Dollani, si dhe Dorien Malaj.
Se çfarë ndodhi, e rrëfeu gazetari Lela:
“E kapëm majën, aty nisi një stuhi që frynte në dy krahët dhe na bëri të pamundur kapërcimin në anën tjetër të majës për t’u ulur në një drejtim tjetër. Era ishte e tillë sa që na merrte mbrapsht. U detyruam të iknim mbrapsht. Ishim pa fat, sepse era dhe i ftohti kishin mbuluar gjurmët duke e bërë uljen më të vështirë.
Në përpjekje për t’u ulur kemi rrëshqitur tre prej nesh, unë i pari.
Me ndihmë të Zotit jam ndalur aty ku nuk mendoja se do të ndalesha më, mendoja se e kisha mbyllur me këtë botë.
Më ka ndaluar një objekt pa shkuar në anën tjetër të shkëmbit. Kyçi besoj që është thyer, shpresoj të jetë ndrydhur. Na janë dashur rreth një orë për të zbritur sepse era ishte forcuar shumë nga i ftohti. Kjo është rezymeja.
Ne jemi grup që bëjmë ekspedita prej shumë vitesh. Ishim një grup miqsh që do të bënim ngjitjen e fundit të vitit e ndërkohë unë dhe kameramani po xhironim e filmonim”, tha ai për mediat. /tesheshi.com/
