Sot futbolli është sporti numër një për nga ndjekshmëria. Për një varg arsyesh, futbolli zë vendin e parë në transmetimet sportive, e pakushtëzuar kjo nga koha.
Por nuk ka qenë gjithmonë kështu. Në dimrat e dy apo pak më tepër dekadave të fundit të shekullit të lënë pas, sporti i skive zinte vend dendur në ekran.
Lojërat Olimpike Dimërore të Sarajevës të vitit 1984 qenë një ngjarje e paharrueshme sportive, aq më tepër që zhvilloheshin aq pranë nesh. Një veprimtari fantastike, siç qenë dhe garat e shumta të skive që zhvilloheshin asokohe.
Pirmin Zurbriggen, Marc Girardelli dhe Alberto Tomba qenë mes skiatorëve më të njohur të kohës. Shumë më spektakolarë dy të parët, shumë më teknik italiani, që qe në vitet ’90 një Valentino Rossi i sportit të skive.
Të paktë janë ata që sot njohin ndonjë prej skiatorëve në garim; vetë ky sport është pak i ndjekur. Veçse mund të thuhet me siguri se është sporti më tërheqës dimëror.
Fotografitë e mëposhtme përcjellin magjinë e rrëshqitjes me ski, një sporti mjaft të bukur, edhe pse tashmë në hije. /tesheshi.com/
