Çahet kloni që ndërtoi Nikolla Gruevski në kufi për të bllokuar refugjatët duke përdorur dhunën. Ndërkohë që 3 mijë vetë vazhdojnë të qëndrojnë në kufi, një tren me 500 refugjatë ka mbërritur në pikën kufitare të Tabanocit. Ata janë marrë menjëherë në kudesin e disa shoqatave humanitare.
Siç njofton Alsat M, treni arriti me 5 orë për shkak të dyndjes së madhe të migrantëve të Gjevgjeli ku vetëm në zonën ndërkufitare po qëndrojnë tashmë mbi 3 mijë persona për të hyrë në Maqedoni.
Të lodhur, uritur, por edhe të keqtrajtuar nga policia kufitare, secili emigrant vraponte pas ushqimit dhe ndihmës mjekësore që ekipet e UNHCR-së, Kryqit të Kuq, shoqatës “Vllaznimi” dhe disa OJQ-ve të tjera ua ofronin.
“Po qëndroja në radhë për të marrë vërtetimin por kishte shumë njerëz. Policia u mundua të organizojë pak vendin dhe filloi të na godasë, të na rrahë. Kemi pritur 16 orë për të marrë dokumentet. Edhe pasi më rrahën qëndrova aty pasi nuk kisha tjetër zgjidhje. Policia madje ka rrahur edhe gratë, të gjithë ata që ishim aty. Ishim me shumë se 700 vetë”, deklaroi një emigrant nga Siria. “Nuk kemi ushqim, as ujë për të pirë prandaj jemi ndalur këtu. Isha 3 ditë e 3 natë në Gjevgjeli pasi nuk arrija të marr vërtetimin nga policia, nuk mundesha të vijë as me autobus, as me taksi as me tren pasi që stërmbushej. Kishte shumë njerëz, dikujt i jepnin e dikujt jo vërtetimin”, tha një tjetër emigrant nga Afganistani.
Në kufirin e Maqedonisë ka shumë emigrantë, prandaj nuk mundeshim të marrim dokumentin. Pritem 3 ditë por më kot. Kemi një vërtetim grek por jo edhe të Maqedonisë”, emigrant tjetër nga Afganistani.
Thuajse i gjithë grupi që arriti nga Gjevgjelia ndaloi vetëm për disa minuta të pushojë në afërsi të stacionit hekurudhor apo në fushën më të afërt ku mund të shiheshin mbetje të zjarreve që kanë ndezur migrantët e mëparshëm gjatë natës. Disa hapa më larg, banorët lokal kishin radhitur tezgat e improvizuara me ushqim qe ua shitnin migrantëve. Disa herë shitësit na paralajmëruan që mos ti filmojmë duke u frikësuar se do të ndeshen me policinë. “Vetëm disa metra larg stacionit hekurudhor këtu në Tabanoc është pika e fundit e emigrantëve që kalojnë këtu në Maqedoni. Pas vetëm disa metrave ata do të arrijnë në territorin serb”.
/tesheshi.com/
