Humbja e djeshme e Realit të Madridit para mbështetësve të vet ndaj rivalëve kryeqytetas të Atletikos nuk e ka penguar Ronaldon të shprehë vlerësimin dhe mbështetjen për trajnerin e tij.
Kjo ishte humbja e parë që kur Zinedine Zidane u ul në stolin e Realit, për të cilën shenjat qenë dhënë që me barazimin në Malaga. Veçse portugezi mendon se atij i duhet dhënë kohë, e se po bën një punë të shkëlqyer me ekipin.
“Ai po bën një punë fenomenale. Eshtë një person shumë i qetë, shumë optimist, dhe po na përmirëson.
Duhet t’i japim kohë,” ka deklaruar Ronaldo.
“Zidane na ka dhënë vetëbesim, edhe pse është e vështirë të humbësh në shtëpi me Atletikon,” ka vijuar të flasë për gazetarët lojtari më i mirë i Realit.
Ronaldo, ashtu si Zidane, e ka pranuar se fitimi i kampionatit spanjoll është tanimë një mision i pamundur, duke e kthyer vëmendjen nga Champions League, ku ekipi madrilen gjendet në pozita të mira.
“Unë shpresoj se është e mundur të fitohet Champions-i, por jo La Liga.”
Duke folur për pakënaqësinë e tifozëve për paraqitjen e djeshme, Ronaldo ka kujtuar se gjërat mund të ndryshojnë nëse ekipi fiton Kupën e Kampionëve: “Ne duam të fitojmë ngahera, por nuk mundeni gjithmonë. Tifozët do të ndryshojnë mendje nëse fitojmë Champions League-n në fund të sezonit.” /tesheshi.com/
