Finalja e sotme e një prej turneve të tenisit më me prestigj në botë, Roland Garros-it, ka ofruar një prej surprizave më të këndshme të saj. Serbi Xhokoviç, numri një në botë, dhe pretendenti kryesor për titullin, ka marrë një mësim të mirë prej zvicerianit Stanisllav Vavrinka. Ky i fundit, kundër të gjitha parashikimeve, ka fituar 3-1, dhe është bërë zviceriani i dytë që e fiton këtë turne, pas Roxher Federerit, që e pati fituar atë në 2009-n.
Edhe një herë nuk është përmbushur ëndrra e Novak Xhokoviçit për ta fituar këtë turne, i vetmi Grand Slam që i mungon në triumfet e tij. Serbi e nisi në fakt mirë ndeshjen, dhe e fitoi setin e parë 6-4. Por tre setet pasardhëse qenë katastrofike për të, të fituara nga kundërshtari 4-6, 3-6, 4-6.
Vavrinka zhvilloi një lojë të jashtëzakonshme në përballjen që zgjati tre orë e dymbëdhjetë minuta, e bëhet kështu lojtari i parë që e fiton këtë turne për të rinj dhe për të rritur që nga viti 1988, kur Mats Vilander bënte të njëjtën gjë. /tesheshi.com/
