Pas një periudhe qetësie, që nga incidenti ku nën dritën e hënës krimi merrte zvarrë policinë – incidenti me goditjen e automjetit të zv.drejtorit të Policisë së Elbasanit – në këtë qytet është rikthyer lufta e bandave, ndonëse pa viktima. Në orët e para të ditës, në një prej lagjeve të qytetit është qëlluar në drejtim të Çapjave, fisit gjëmëmadh që është në konflikt me Çelajt, poseduesit e audit të blinduar që goditi automjetin e policisë dhe më pas vijoji qetësisht rrugën.
Dhe më vonë, është gjendur e makina nga kanë dalë të shtënat, e djegur në një pjesë të mirë të saj, por me targa të dallueshme të cilat kanë rezultuar falso.
Ngjarja e javëve me parë e cila u sfumua nga përgjimet e famshme të Habilajve, dhe prej së cilës policia u shfaq e poshtëruar dhe e nënshtuar publikisht ndaj krimit, pasoi një valë lëvizjesh në kupolën e policisë së Elbasanit, por që me ç’po duket nuk kanë dhënë efekt në terren: krimi është rizgjuar pa frikën e ndëshkimit.
Ndërkohë, policia e drejtuar nga Haki Çako, njeriu që mban mbi shpinë vulën e “drogimit” të saj, ka shënuar së fundi dhe dy dështime të tjera. Atentatorët e dy vrasjeve në Lushnjë, edhe pse të identifikuar pak minuta pas ngjarjes që përgjaku qendrën e qytetit myzeqar, nuk janë kapur ende. Edhe për këtë ngjarje që dha sinjalin se hija e Aldo Bares endet ende atyre anëve, pati lëvizje policore. Madje ishte vetë ministri Xhafaj që shkoi dhe ua mblodhi vartësve nën uniformë, por rezultati në terren deri më tani është zero.
Më tej, është vrasja në derën e shtëpisë të vëllait të ish-deputetit lezhian Arben Ndoka, Aleksandër Ndoka. Edhe për këtë rast nuk ka asnjë përgjigje policore, asnjë shenjë të një policie në detyrë, siç kanë parapëlqyer të shprehen Rama e Tahiri deri dje. /tesheshi.com/
