Kur thonë që Conor McGregor “nuk merret vesh” cfarë tipi është, çfarë thotë e çfarë bën, nuk e kanë kot. Kampioni i arteve marciale mikse, e së fundmi boksieri profesionist, të cilin kanë dëshirë ta “rrahin” shumë kampionë e ish-kampionë të këtij sporti, ia “këput një të trashë”: Mund edhe të tërhiqet nga aktiviteti. Dhe kësaj rradhe nuk është ndonjë shaka e tij, por është një deklaratë e bërë nga Presidentja e UFC, Dana White. Sipas saj, McGregor mund të mos ndeshet më.
Mediat kanë nxituar të kuptojnë shkaqet, kur krejt e kundërta është ajo çka thuhet në dritë të diellit, e kur “ofertat” për t’u ndeshur me irlandezin, sa vijnë e shtohen nga emra prestigjozë. Ndërkohë mediat kanë “gërmuar” më thellë e atje kanë gjetur shkaqe, përse kjo deklaratë nuk është e papritur. Sipas tyre, dyshimet për vazhdimësinë e McGregor në sportet “burrërore”, u ngritën që në muajin gusht, kur ai u mund në ndeshjen me kampionin e botës Floyd Maywether.
Por ka edhe më, sepse irlandezi kampion bote në sportet marciale, ka shtuar ambiciet. Ai mësohet se ka kërkuar të jetë aksioner i Federatës së këtyre sporteve, çka nënkupton automatikisht, largimin nga sporti i ushtruar, për të mos patur konflikt interesi. E nëse më parë, presidentja White, as e çonte ndër mend këtë ofertë të McGregor, tani që “historia” lidhet me tërheqjen e tij, është shumë e mundshme të merret në konsideratë. E kur palët vijojnë të merren me këtë çështje, del në sfond edhe një tjetër rival, kësaj rradhe në sportet marciale miks, që quhet Tony Ferguson, që i kërkon sfidë irlandezit, për të unifikuar titujt e kampionit të botës në federatën UFC.
Në pamje të parë, mes dëshirës për t’u investuar si aksioner i federatës dhe kundërshtarëve që janë “vënë në rradhë” për tu ndeshur, si në boks ashtu edhe në arte marciale, McGregor nuk ka përse lë sportin. Por 30-vjeçari nuk është tip që parashikohet lehtë në atë që do e atë që bën. Për më tepër, që e ka shkruar me dorën tij në profilet sociale se do ta lërë sportin në moshë të re. Prandaj, për tipa si ai, kurrë mos thuaj kurrë…për asgjë. /tesheshi.com/
