Nga Ylli Pata
Ben Blushi nuk se ka thënë sot ndonjë gjë te re në polemikën e tij të hapur që prej dy vjetësh me Edi Ramën.
Por Ben Blushi, sot i ka shtruar kritikat e tij aty ku “ka qejf” shumë populli socialist: në organet e partisë, një ves konjuktural që të majtët e kanë më të mbrujtur se të djathtët, duke krijuar një traditë politike, që siç duket pak nga pak po zë vend edhe në mbledhjet e grupit parlamentar të PD-së tani me Bashën kryetar.
Gjithsesi Blushi i ka kërkuar Edi Ramës, gjënë më normale në botë: zgjedhjet e brendshme për kryetarin dhe për partinë, veprim që është i përkrahur nga shumë njerëz brenda së majtës por edhe jashtë saj në shoqëri.
Demokracitë brenda organizatave politike janë jetike për shëndetin e demokracisë në shtet dhe më gjerë.
Por Ben Blushi ka një defekt dhe jo të vogël. Ai vetëm konstaton, gjë që nuk është fare detyra e tij. Ajo është e drejta jonë si opinion publik. Ben Blushi është politikan dhe ka detyrë të gjejë mekanizmat për t’i ndryshuar gjërat sipas ideve që ai mbron.
Ndryshe do të mbetet oponenti i vetëm me zë në PS, kur realisht kudo ka mendime të ndryshme. Përshembull, një anëtar i Asamblesë së PS-së, ish-zv.ministri i Mbrojtjes, publicisti Dritan Hila, çdo ditë boton qëndrime ndoshta edhe më të forta se Blushi në kritika ndaj politikave dhe eksponentëve të qeverisë, por Ben Blushi, jo vetëm nuk lëviz por as nuk e ka ndërmjend të krijojë një “komzos” politik për të lobuar idetë e tij. Pra që të bëjë politikë. Duket sikur thjesht ka vënë “kavanozin” në garën për pretendentë në selinë e PS-së duke pritur kohën e tij. Kjo kohë edhe mund të vijë por nuk do të ketë besueshmërinë që mund të ndryshojë gjërat për të cilat s’ka lëvizur as gishtin. Dhe ç’ështjë më e keqja “armët” po ia merr vetë Rama, i cili ka hapur partinë për njerëz nga shoqëria, do të ndryshojë përbërjen e Asamblesë etj, duke krijuar premisat e një ndryshimi nga lart-poshtë, i cili dihet rrezikon “klonimin” e politikanëve që telekomandohen në formë dhe përmbajtje nga shefat. Taulant Balla është tipiku i këtij lloji që gjithsesi është në të drejtën e tij.
Rama, sot në polemikën me Blushin, i tha që ti e sulmove PS-në kur të gjithë po luftonin për vota, pra në kulmin e fushatës elektorale. Me fjalë të thjeshta i ke dhënë “gjuajtje poshtë brezit”. E në fakt, kjo është e vërtetë dhe në politikë njihet si inkoseguencë. Nga ana tjetër polemika e Blushit në vulgun e fushatës, jo vetëm që nuk prodhoi efekt kundër PS-së por thelloi diferencën me të djathtën. Por kjo nuk do të thotë se shoqëria qoftë edhe ajo brenda së majtës nuk i mirëpret kritikat, përkundrazi e ka thënë mëse njëherë. Dhe Rama i cili bën sondazhe permamente nga profesionistë për të matur “temperaturën” e elektoratit e di shumë mirë këtë.
Ben Blushi, nëse e ka seriozisht betejën principiale të ideve duhet të bashkojë njerëz dhe të lobojë për t’i kanalizuar në politikë. Ndryshe merr vetëm ‘like’ në Facebook dhe pret për t’u bërë një ditë ose kryetar, kryeministër apo kryetar bashkie e në fund s’bëhesh se “nuk të do baza”. Siç ndodhi me Pandeli Majkon. Pra troç bëhesh i padobishëm. Modeli “Meta” edhe pse në rrethana të ndryshme ka qenë efikas pikërisht se nga një “përrua” u kthye në “lumë” politik që rrezikon në çdo zgjedhje të përmbysë tokat e të mëdhenjve./tesheshi.com/
