Si çdo cikël zgjedhor, edhe kësaj rradhe në Maqedoni ekziston frika nga manipulimet e mundshme. Dhe si garancë për evitimin e tyre, në prag të zgjedhjeve të parakohshme parlamentare të 11 dhjetorit, 22 struktura rinore të partive politike në Maqedoni kanë nënshkruar Deklaratën për zgjedhje të lira, korrekte dhe demokratike.
Me nënshkrimin e kësaj deklarate, këto struktura rinore zotohen se do të angazhohen për mbajtjen e zgjedhjeve të lira, korrekte dhe demokratike dhe se nuk do të bëjnë asgjë në drejtim të frikësimit të qytetarëve për të dhënë votën e tyre për ndonjërën nga partitë garuese.
Gjithashtu, nënshkruesit zotohen se do të angazhohen për mënjanimin ose minimizimin e gjuhës së urrejtjes, nuk do të dëmtojnë materialin propagandues të partive tjera dhe se do të bëjnë një fushatë të sinqertë. /tesheshi.com/
