Rihapet “21 Janari” vetëm dy muaj para zgjedhjeve vendore të 21 qershorit. Çështja e “nxehtë” në lidhje me vrasjen e 4 protestuesve të opozitës në 21 janar 2011 është risjellë sot nga ministri i Brendshëm, Sajmir Tahiri, i cili ka deklaruar në Kuvend se Shërbimi i Çështjeve të Brendshme dhe Ankesave në këtë dikaster ka depozituar një padi penale ndaj liderit të opozitës, Lulzim Basha, i cili para 4 vitesh ishte në detyrën e Ministrit të Brendshëm.
“SHÇBA në Ministrinë e Brendshme ka kallëzuar Lulzim Bashën për shpërdorim detyre, pasi në 21 janar 2011 ka
urdhëruar ngritjen e helikopterit për të hedhur lëndë helmuese mbi protestuesit. Ministri nuk mund të jetë drejtues operacional dhe aq më tepër të japë urdhra për përdorimin e lëndëve kimike”, tha Tahiri. Ai akuzoi më pas se ishin falsifikuar librat e Gardës. “SHÇBA ka depozituar një padi, për ngjarjen e 21 janarit 2011, u gjet se ka falsifikim dhe urdhra të kundraligshëm nga ishMinistri i Brendshëm Lulzim Basha dhe ishdrejtues të Gardës. Ka një urdhër në 16:28 nga ishministri Lulzim
Basha “Komunikoni me gjeneralin, të ngrihet helikopteri dhe të hedhë lëndë helmuese te protestuesit te Piramida”. Më pas kjo frazë është korrigjuar, tha Tahiri. Në një tjetër komunikim, të orës 14:54 Ndrea Prendi thotë “asnjë lloj zjarri pa zbatuar urdhrin ndaj protestuesve”. Por edhe kjo nga hetimi rezulton se është e korrigjuar, u shpreh Tahiri.
Por Berisha është munduar të mohojë këto akuza, duke thënë se ishin skenarë filmi. Ish-Kryeministri i është kundërpërgjigjur Tahirit duke i thënë se po citonte mafien. “Shko të thotë Ina Rama historinë e shkresës. Citon mafien, pasi je pjellë e saj”, tha Berisha. Ndërkaq, duke folur në emër të opozitës, numri 2 i saj Arben Ristani tha se Pas Tahirit ka reaguar ish-kryeministri Berisha dhe deputeti Arben Ristani, të cilët i ka cilësuar shpifje dhe sajesa akuzat e Tahirit. Sipas Ristanit, urdhërat për ngritjen e helikopterit i jep vetëm drejtori i Përgjithshëm i Policisë dhe jo ministri i Brendshëm. Ristani shkoi më tej duke aluduar se Tahiri mund të jetë nën efektin e drogës.
/tesheshi.com/
