Ribashkohet opozita kosovare, por për çfarë?

Nga Blendi Gashi

Një vit pas prishjes së raporteve dhe bashkëpunimit që kishin për disa muaj gjatë krizës politike, tre partitë opozitare Vetëvendosje, AAK e NISMA u bën bashkë sërish  kundër Thaçit e Mustafës, këtë herë për të kundërshtuar shkuarjen e tyre në Bruksel për të biseduar me palën serbe.

Shefat e grupeve parlamentare, Glauk Konjufca (VV), Pal Lekaj (AAK) dhe Valdete Bajrami (Nisma), ashtu siç bën shumëherë gjatë kohës së krizës, të martën e kësaj jave thirrën së bashku një konferencë për media, ku hodhën akuza në drejtim të presidentit dhe kryeministrit.

Këto parti bashkë i bëri edhe arrestimi i Ramushit, ku protestuan në disa qytete, derisa nënkryetarja e kësaj Lëvizjeje, Aida Dërguti udhëtoi për në Francë ku takoi Haradinajn.

Dhe pashmangshëm të gjitha këto afrime të bëra ditëve të fundit, shtrojnë pyetjen legjitime nëse opozita po bashkon sërish forcat në një betejë të dytë për të rrëzuar nga pushteti koalicionin PDK-LDK, duke parë se të ndara vështirë mund t’ia arrinë qëllimit?

Ndonëse subjektet në fjalë nuk e mohojnë që ka një afrim mes tyre, thonë se veprojnë si një “trup”, vetëm për tema të caktuara, ndërsa mohojnë të jenë duke zhvilluar biseda për një ribashkim të mundshëm.

Zyrtari për media në Vetëvendosje, Shkodran Hoti, thotë se Lëvizja e tyre është në gjendje të bashkëpunojë jo vetëm me dy partitë opozitare, por edhe me shoqërinë civile dhe këdo që ka vullnet të mbrojë interesin shtetëror e kombëtar.

“Në këtë frymë ka filluar edhe bashkëpunimi me AAK e NISMA. Pra, edhe tani, përderisa dy partitë kanë qëndrim kundërshtues ndaj procesit të dialogut,  normalisht që do të ketë bashkëpunim dhe iniciativa të përbashkëta për pumundësimin e dialogut të padrejtë e të pabarabartë. Tani, gjëja më e rëndësishme është ndërprerja e dialogut sepse është mënyra e vetme që të mos minimozohet tutje shtetësia e Kosovës”, thotë Hoti, për tesheshi. com.

I pyetur se a po zhvillohen takime mes drejtuesve të partive për ribashkim kundër pushtetit, ai ka mohuar një gjë të tillë.

“S’ka diskutime për këtë. I vetmi bashkëpunim është ky në kundërshtim të proceseve të dëmshme”, thotë Hoti.

Edhe zëdhënësi i AAK-së, Muharrem Nitaj, mohon që partitë opozitare të jenë duke zhvilluar biseda për ribashkim të mundshëm.

“Qëndrimi i përbashkët për dialogun, duhet parë si të tillë e jo në kontekst më të gjërë. Se si do të zhvillohen proceset politike më vonë, nuk mund t’i parashohim tani”, ka thënë Nitaj, për tesheshi. com.

Pavarësisht qëndrimeve të dy partive të lartcekura, deputeti i NISMA-s, Zafir Berisha, haptazi ka dalë me kërkesë për formimin e një fronti të përbashkët politik.

Ai thotë se fronti i përbashkët politik VV, AAK, NISMA dhe AKR është më se i nevojshëm në këtë kohë në të cilën po kalon vendi.

“Ky front di t’ia kthente krenarinë dhe identitetin, qytetarit të vendit dhe do të trasonte rrugën për integrime euroatlantike. Në shikim të parë mund të duket i pamundur ky front politik për shkak të dallimeve programore politike, por kjo mund të realizohet për interes të shtetit, nëse këto dallime përkohësisht i fusim në arkiva për hirë të nevojës urgjente të cilën e ka Kosova për të dal nga kjo krize e dëmshme e cila i ka zënë frymën perspektives së qytetrëave dhe Kosovës”, ka pohuar Berisha, për tesheshi. com.

Ai thotë se për shtetin të gjithë duhet sakrifikuar diçka nga vetja.

“Kosova, stabiliteti i saj ekonomik dhe i sigurisë jo që rrezikohen vetëm nga jashtë, por janë duke u rrezikuar seriozisht edhe nga krimi i organizuar i cili e ka kapur shtetin dhe i cili ka siglën LDK-PDK-Srbska. Forca nuk e bën fuqinë, por bashkimi bën fuqinë për ta mundur të keqen”, thotë Berisha.

Ndryshe, tre partitë opozitare për shtatë muaj së bashku organizuan protesta brenda dhe jashtë Kuvendit, kundër “Zajednicës” dhe Demarkacionit, por që më pas raportet e tyre u prishën, pasi nuk u pajtuan se kush do udhëheqte një listë eventuale të përbashkët për zgjedhjen nacionale.

Edhe pjesëmarrja e Ramush Haradinajt në një takim me liderët të thirrur atë kohë nga presidentja Atifete Jahjaga, që u bojkotua ngaVisar Ymeri i VV-së dhe Fatmir Limaj i NISMA-s, bën që këto parti përfundimisht të ndajnë rrugët. /tesheshi.com/