Nga Bekim Laçi
Po kalon edhe një verë tropikale, në të cilën qytetarët e Shkupit mbeten të privuar nga mundësia që të pushojnë në qendrën rekreative, të cilën e kanë ndërtuar me kontributet e tyre.
Pishina pa ujë, restorante që nuk punojnë, ndërtesa të rrënuara, tualete jo-funksionale nga të cilat përhapet erë kundërmuese dhe kamp- shtëpizat e braktisura; janë vetëm disa nga treguesit se kjo qendër është lënë pas dore, ndërsa vetëm dy dekada më herët ishte vendi kryesorë për piknik, not dhe aktivitete sportive me fusha për tenis, futboll, basketboll etj..
Liqeni i Sarajit gjendet në vetëm 12 kilometra largësi nga qendra e Shkupit, dhe kap një sipërfaqe prej 136.000 metrash katrorë, me kapacitet për 20 mijë pushues.
Por ky kompleks pushues, i ndërtuar në vitet e ‘70-të të shekullit të shkuar vazhdon të mbetet jashtë çdo lloj funksioni që nga viti 1998, përkundër një tenative për ta ringjallur atë në vitin 2003, e cila rezultoi si e dështuar.
Ka qytetarë të cilëve nuk u bën përshtypje tabela me paralajmërimin se uji në liqen nuk i plotëson kushtet higjienike, sepse siç na thanë disa turistë këtë verë kanë ardhur regullisht dhe janë mirë me shëndet:
”Vij çdo ditë me djalin, dhe shyqyr Zotit jemi mire, na tha Shabani. “Nuk durohet vapa ndërsa s’kemi mundësi financiare për pushime në det”, thekson Nusret Nexhipi, një mesoburrë banor i kryeqytetit.
Ka dhe të atillë që janë të bindur se shteti qëllimisht nuk ka investuar në këtë qendër rekreative duke i favorizuar pishinat në qytet, sepse Saraji është komunë me popullatë dominuese shqiptare ndërsa pretendimet i argumentojnë me faktin se për kohë të gjatë ky kompleks ka qenë nën kompetencë të Komitetit Olimpik dhe më vonë Qytetit të Shkupit,(si organizim territorial), por pas kërkesave të shumta, qeveria me një vendim e ka kthyer kompleksin nën administrimin e komunës së Sarajit.
Kryetari i komunës, Bekim Murati, për portalin tesheshi.com tha se është korigjuar një e padrejtë që i është bërë komunës, pa dashur të hyjë në polemika për arsyet që kanë sjellë kompleksin në këtë stad të amortizimit: “Ne jemi të vendosur që këtë kapacitet, i cili është pasuri për të gjithë banorët e Sarajit ta vëmë në funksion, t’i kthejmë jetën, dhe të mundësojmë zbavitjen dhe argëtimin për të gjithë banorët në ujrat dhe natyrën që ofron liqeni, si dhe të kthejmë sa më tërheqës, jo vetëm për qytetarët e Maqedonisë por edhe për turistët e huaj”, tha Murati.
Kreu i Komunës së Sarajt, sqaron më tej, se në këtë fazë ka përfunduar hartimi i planit detaj urbanistik dhe tani ai gjendet në institucionet përkatëse qendrore, nga të cilët duhet të merr edhe pëlqimi ligjor.
“Besoj që vitin e ardhshëm ky liqen të vihet në funksion, dhe gjatë ditëve të nxehta të verës të jetë një alternativë freskie, jo vetëm për banorët e Sarajit dhe kryeqendrës së Maqedonisë, por dhe më gjerë.
Me planin e ri urbanistik parashihet ndërtimi i qendrave të shumta rekreativo-sportive, fusha tenisi, futbolli, basketbolli, si dhe aquaparku, i cili do të jetë mjaft tërheqës për të gjithë qytetarët, ndërsa është paraparë edhe ndërtimi i kapaciteteve hotelierike dhe restoranteve, të cilat do të garantojnë një rehati për pushuesit, të cilët do të vendosin të pushojnë në Liqenin e Sarajt”, thekson Murati.
Interesimi për riaktivizimin e këtij objekti shumë të rëndësishëm është i madh, potencoi Murati, ndërsa thekson se të interesuara janë kompani nga Turqia, Katari, Belgjika si dhe kompani vendore.
“Jemi duke i shqyrtuar të dyja mundësitë edhe për formën e partneritetit private- public, ashtu edhe për atë të konçensionit, por sidoqoftë, vendimin përfundimtar do ta marrë këshilli komunal pas hartimit të studimit të fizibilitetit”, deklaroi kryetari i komunës së Sarajit, Bekim Murati.
Në bazë të të dhënave, në Komunën e Sarajit jetojnë afro 36 mijë banorë, prej të cilëve mbi 90% janë shqiptarë. Komuna nuk ka ndonjë zhvillim të theksuar ekonomik, prandaj vënia në funksion e liqenit dhe qendrës rekreative në Saraj, shihet si mundësi e mirë për zhvillim ekonomik.
/tesheshi.com/
