Presidenti malazez Milo Gjukanoviç, po ndihet triumfator nga fakti i rënies së qeverisë proserbe të Krivokapiçit, mundësuar kjo nga shqiptari Dritan Abazoviç, zëvëndësi i tij në kabinet. Dhe, në pritje të një qeverie të re, të pakicës, Gjukanoviç tha se duhet kohë për të kuptuar se “çdo ndryshim nuk do të thotë ndryshim për mirë”, duke thënë se Mali i Zi “ka kaluar një ndryshim për keq”.
“Ne do të mbështesim çdo qeveri që do të ruajë karakterin qytetar dhe laik të Malit të Zi, do të promovojë demokracinë multietnike dhe do të kontribuojë në zhvillimin dinamik ekonomik, në mënyrë që Mali i Zi, si një vend i zhvilluar demokratikisht dhe ekonomikisht, të jetë pjesë e Bashkimit Evropian në të ardhmen e afërt”, tha presidenti malazez në një intervistë për DW.
Gjukanoviç vlerësoi se vendi i tij tani është “në proces të konsolidimit të pushtetit” dhe se interesi më i madh i tij është që sa më shpejt të ketë një qeveri të përgjegjshme.
Presidenti malazez kujtoi se partia e tij, Partia Demokratike e Socialistëve (DPS), ofroi mbështetje për një qeveri të pakicës edhe pas zgjedhjeve të vitit të kaluar, duke besuar se “do të ishte shumë e rrezikshme për Malin e Zi nëse koalicioni qeverisës do të varej kaq shumë nga nacionalizmi serb i madh”.
Sipas Gjukanoviçit, qeveria e mëparshme përbëhej nga tre koalicione, prej të cilave, siç tha, “një koalicion i profilizuar plotësisht i Serbisë së Madhe dhe ne menduam se nëse vendos për politikën shtetërore, do të jetë shumë i rrezikshëm për Malin e Zi”.
“Sot ne themi: jemi të gatshëm të mbështesim qeverinë e pakicës – pra, koalicionet që kanë natyrë qytetare, që duan të ndihmojnë Malin e Zi të ecë drejt Evropës – ne jemi të gatshëm ta mbështesim atë qeveri dhe nuk do të marrim pjesë në të. Padyshim që u deshën 14 muaj përvojë të pasuksesshme për t’u kthyer në këtë propozim”, tha Gjukanoviç.
Politikë e përgjegjshme nga pozicioni i opozitës
Duke folur për partinë që ai drejton, Gjukanoviç vlerësoi se DPS-ja në 14 muajt e fundit ka treguar se mund të jetë e përgjegjshme dhe si opozitë. “Mendoj se falë nesh, falë opozitës shtetformuese, Mali i Zi arriti t’i rezistojë ofensivës së Beogradit. Pas 30 gushtit kaluam një ofensivë shumë agresive nga Beogradi. Nacionalizmi serbomadh nga Beogradi kuptoi se fitorja e të preferuarve të tyre hapi derën për një aneksim të ri të Malit të Zi, këtë herë përmes projektit ‘Bota Serbe’. Kjo nuk ndodhi sepse kishim një opozitë me përgjegjësi shtetërore të drejtuar nga DPS”. /tesheshi.com/
