Nga Blendi Gashi
Presidentja, kryeministri, parti opozitare, deputetë dhe analistë, kanë reaguar ashpër pas lajmit për shkarkimin e rektorit të UP-së Ramadan Zejnullahu.
Vendimi vlerësohet i padrejtë që ka për qëllim ngufatjen e Universitetit nga klanet kriminale dhe kërkohet që vendimi të rishikohet menjëherë.
Presidentja Atifete Jahjaga, vendimin për shkarkimin e Zejnullahut e sheh si shqetësues, kundër angazhimit për reformimin e Arsimit të Lartë dhe vendosjes së kritereve të larta akademike.
“ I jap përkrahjen time nismës së kryeministrit që ky vendim të rishikohet menjëherë. UP-ja është institucion i pavarur dhe duhet të mbetet i tillë, në mënyrë që të prodhojë vlera të ndershmërisë dhe liderë të së nesërmes, e jo vend i skandaleve e plagjiaturës”, ka deklaruar presidentja.
Vendim jo të drejtë dhe të dëmshëm e ka vlerësuar edhe qeveria e cila thotë se kryeministri Isa Mustafa në koordinim të plotë me ministrin e Arsimit, Arsim Bajrami, do të kërkojnë rishikimin e këtij vendimi.
“Qeveria e Republikës së Kosovës konsideron se Universitetit të Prishtinës nuk i duhen veprime të tilla që e dëmtojnë Universitetin e Prishtinës pikërisht në periudhën kur Universiteti i Prishtinës po bënë hapa të mëdhenj përpara në drejtim të ngritjes së cilësisë dhe avancimit të gjithëmbarshëm të Universitetit të Prishtinës “Hasan Prishtina””, thuhet në deklaratën e Qeverisë.
Lëvizja Vetëvendosje, vlerëson se një vendim i tillë ka për qëllim ngufatjen e Universitetit nga klanet kriminale që veç me dijen e studimin nuk kanë lidhje.
“Vendimi i sotëm paraqet goditje të përpjekjeve për të vendosur standarde e kritere brenda Universitetit. Si i tillë, është ngadhënjim i babëzisë kundër përkushtimit; i sofizmit kundër dijes; i klaneve kriminale kundër studentëve dhe gjithë shoqërisë. Ky rast na mëson se nuk mund të kemi ishuj lirie brenda Kosovës së mbërthyer nga krimi e korrupsioni. Mënyra dhe zhvillimi i gjërave brenda Universitetit është pikëpamje përmes të cilës shpjegohet mbarë Kosova. Zaten, vështirë se do të bënin gjithë këto koncesione e shpronësime, pa e sjellur së pari Universitetin në këtë gjendje. Argumenti i forcës do të përdorët vetëm pasi ta kesh vrarë fuqinë mobilizuese të argumentit”, thuhet në reagimin e VV-së.
Deputeti i PDK-së, Rrustem Mustafa – Remi, përmes një shkrimi në Facebook ka thënë se vendimi nuk duhet të hyjë në fuqi. 
“Kosova futet me një këmbë në UNESCO, ndërkohë në Prishtinë Këshilli Drejtues i UP-së, vendos të shkarkojë Rektorin Ramadan Zejnullahu. Të dy këto ngjarje kanë disa të përbashkëta…që të dyja kanë të bëjnë me arsim, shkencë e kulturë, janë dy kërkesa që kërkonin shumicën e votave. Në UNESCO, ia dolëm falë mbizotërimit të së mirës mbi të keqen. Fatkeqësisht, në Prishtinë, në Votimin e KD të UP, ndodhi e kundërta. E keqja fitoi mbi të mirën. Si duket të tjerët na duan të mirën, më shumë sesa ne vetëvetes. E këtë fakt vështirë për t’a gëlltitur…Besoj Ministri i Arsimit, Shkencës dhe Kulturës ka lobuar fuqishëm për të mirën e UP-së..?!”, ka shkruar Remi.
Ilir Deda, deputet i VV-së, poashtu përmes një postimi në Facebook ka shkruar se Zejnullahu është i vetmi që tentoi që UP-në ta ndërtojë në institucion të dijes, arsimit e shkencës.
“Pa të nuk ka përparim në arsim, po rahatim të gjithë atyre që i blenë gradat akademike. #meRektorin!”, ka shkruar Deda.
Lumir Abdixhiku, drejtor i Institutit Riinvest, shkarkimin e rektorit e ka quajtur lajm të pabesueshëm dhe dëshpërues dhe triumf të analfabetëve.
“Sot uzurpatorët e analfabetët e bashkuar rikapën UP-në; ja dolën. Me këtë i dhanë fund dhe mundësisë së vogël për të bërë mbarësi këndej. Rektori dhe përpjekja e tij treguan se luftimi i kapjes e rrënimit është i pamundur në Kosovë. Të lënë vet; politika, intelektualët, taksapaguesit, secili vetëm për veti. Një shoqëri pasive e pranuese e mbrapshtisë nuk prodhon shpresë – prodhon dëshpërim. E të gjithë ju studentë të UP-së, ju dhjetra mijëra spektatorë të fatit tuaj, ju që toleruat një grusht analfabetësh mësimdhënës e rrahagjoksash të ju dërgojnë për në theqafje, nuk meritoni as ato copë letra që i thirrni diplomë. Padituria e përjetshme nga ‘fabrika e paditurisë’ është shpërblim meritor i juaji. Rrini të padije e të papunë!”, ka shkruar në Facebook Abdixhiku.
/tesheshi.com/
