Shterpësi e jashtëzakonshme në javën e katërt të Superligës shqiptare. Ka fituar vetëm një skuadër, Skënderbeu, ndërsa është shënuar vetëm një gol në pesë takime.
Golashënuesi i vetëm i kësaj jave ka qenë nigeriani Adeniyi, që i ka dhënë fitoren 1-0 Skënderbeut ndaj Luftëtarit.
Plot katër sfida, Korabi – Vllaznia, Laçi – Kukësi, Flamurtari – Teuta dhe Partizani – Tirana, kanë patur të njëjtin rezultat: 0-0!
Eshtë shpresuar që derbi i kryeqytetit ta prishte rregullin. I luajtur në “Elbasan Arena”, si Partizani dhe Tirana nuk ia kanë dalë t’i gëzohen golit, pavarësisht rasteve që nuk kanë munguar.
Për më keq, tre skuadra nuk kanë shënuar të paktën një gol në katër javë. Laçi, Korabi e Teuta nuk e kanë tundur ende një rrjetë kundërshtare.
Jo më mirë kanë qenë dhe tre javët e para. Katër gola janë shënuar gjithsej në javën e parë të kampionatit, ku ka patur po ashtu tre barazime 0-0. Më ndryshe ka qenë java e dytë, falë fitores së thellë, 5-0, të Flamurtarit ndaj Luftëtarit. Dhjetë gola në këtë javë, por nuk mungojnë sërisht dy barazime të bardha. Po dhjetë gola shënohen në javën e tretë, veçse për herë të parë ka vetëm një barazim, e ai 2-2.
Listën e golashënuesve e kryesojnë Pejiç, Salihi e Shkodra, me nga tre gola, ndërkohë që kampionatin e kryeson Skënderbeu me pikë të plota. /tesheshi.com/
