Të rinjtë e shkollës së mesme “Zef Lush Marku” në Shkup, nën regjinë e 18-vjeçarit Murat Zherka, po konkurrojnë për filmin më të mirë në botë me metrazh të Shkurtër. Filmi i tyre quhet “WHY”(PSE?), në të cilën konkurrojnë këta të rinjë mban emrin ‘MobileFilm Festival’ dhe mban titullin ‘Act On Climate Change’ që ka për qëllim të sensibilizojë botën për ngrohjen globale. Njëjtë edhe punimi i Murat Zherkës ka këtë tematikë. Në një intervistë për portalin tesheshi.com, Murat Zherka sqaroi më shumë rreth filmit në fjalë, mënyrën e votimit dhe ambiciet e tij në të ardhmen.
Intervistoi: Mensur Krasniqi
Jeni vetëm 18-vjeçar dhe keni pasion filmin. Pse?
Unë mendoj se nuk është me rëndësi mosha, njeriu në çdo moshë mund të ketë pasione. Qysh nga fëmijëria kam kultivuar ndjenja të veçanta mbi filmin dhe këtë e kam realizuar duke xhiruar filma të metrazhit të shkurtër. Në fillim në mënyrë amatore e tani në mënyrë më profesionale. Një ndër filmat të xhiruar në mënyrë profesionale është edhe filmi “Why?”.
E sheh veten si regjisor në të ardhmen?
Duke pasur parasysh sukseset momentale dhe përkrahjen maksimale nga ana e shoqërisë, familjarëve si dhe gjithë shqiptarëve, kjo më motivon që unë të vazhdoj rrugën e kinematografisë.
Po çka ju shtyri të realizoni filmin me metrazh të shkurtër? Na thuani diçka më tepër për këtë film “Why”?
Sukseset e shumta në vendin tonë na motivuan që ta provojmë veten në gara më të mëdha, ndërsa ajo që na shtyu më tepër ishte tema e përcaktuar nga MOBILE FILM FESTIVAL, temë e cila është aktuale në vendin tonë, pra kishim fatin që brenda 60 sekondave të tregojmë realitetin. Sa i përket filmit “Why?” u realizua brenda një jave në qytetin e Shkupit, edhe pse bëhet fjalë për 60 sekonda, puna ishte shumë e madhe por me ndihmën e grupit ia arritëm ta realizojmë atë që deshëm, pra secili kishim detyrat tona pra kjo na ndihmoi. Filmi u realizua në mënyrë profesionale dhe u realizua nga një ekip i mrekullueshëm që ja vlen t`i përmendim; Agnesa Fetai dhe Sara DrasHkoviç (Screenplay), Emil Petrov (editor), Sumeja Shabani (Storyboard), Ela Lazam .e cila aktroi rolin “fatin e shumë fëmijëve të cilët marin frymë në një vend të shkatërruar nga më të mëdhenjtë”.
Keni kërkuar ndihmë nga publiku shqiptar që t’ju përkrahin nëpërmjet votave në mënyrë që të arrini të merrni shpërblimin e filmit më të mirë në metrazh të shkurtër. Çfarë gare është kjo?
Bëhet fjalë për një garë e cila mbahet në Paris. Është garë që marin pjesë 765 filma nga 70 shtete, dhe udhëhiqet nga regjisorë me famë botërore. Kemi kërkuar përkrahje dhe përkrahjen e kemi, dhe kjo e tregon më së miri pra për momentin jemi në vendin e 4 në botë ku kemi afër 40.000 vota dhe 50.000 shikues. Dua të them se për ne pra shqiptarët e parë që marrin pjesë në një garë kaq të madhe, mjaftonte që të jemi pjesë e filmave më të mirë në botë. Por siç e thash përkrahja na pozicionon në vendin e 4. Neve na duhet përkrahje deri më 30 nëntor ku ftoj të gjithë të votojnë.
Se si votohet e tregon videoja e postuar në youtube duke e kërkuar “Mënyra e votimit” votimi bëhet në faqen www.mobilefilmfestival.com .
Pra, në rast se jam në top 10 filmat me më shumë vota, unë do të marrë pjesë në ceremoninë që mbahet me 7 dhjetor në Paris ku ftohen të gjithë regjisorët e filmave të votuar.
A keni realizuar edhe ndonjë film tjetër, përveç filmit “Why”
Po. kemi realizuar edhe disa filma ku nuk munguan edhe çmimet e ndryshme. Dy herë u shpërblyem me vendin e parë, një herë me vendin e tretë në gara me filma të ndryshëm në Maqedoni.
Cilat janë planet e juaja më tutje?
Të shkoj në Paris, dhe të kthehem me fitore.
Ja dhe linku i filmit
/tesheshi.com/
