Shkupi ka bllokuar prej disa ditësh disa prodhime bujqësore shqiptare të cilët ndodhen në kufi me Maqedoninë.
Sebepi i bllokimit është bërja e analizave, kur në fakt çdo mall është i shoqëruar me certifikatë shqiptare sipas marrëveshjes dyopalëshe.
Për këtë çështje janë përplasur dhe dy ministrat e Bujqësisë, të cilët kanë marrë pjesë në takimin e vendeve të Europës Juglindore.
Ministri shqiptar Edmond Panariti tha se “Ngjarje të kësaj natyre duhet të evitohen me bashkëpunim mes vendeve, duke njehsuar praktikat, procedurat, standardet, duke zbatuar jo në mënyrë diskriminuese marrëveshjet fitosanitare sepse gjërat bëhen edhe në emër të tyre. Këto ngjarje marrin edhe trajtën e luftrave tregtare. Jam i bindur që do të gjejmë një zgjidhje të qëndrueshme”.
Ndërsa Boban Iliç, Sekretari i Përgjithshëm i Sekretariatit Rajonal për Zhvillimin Rural, tha: “Nuk jam këtu në emër të qeverisë maqedonase. Jam maqedonas, por drejtoj platformën për bashkëpunimin rajonal. Brenda saj po punojmë për të lehtësuar konfliktet dhe gjetur, siç thotë ministri, një zgjidhje të qëndrueshme”.
Bllokimi i produkteve shqiptare në kufirin me Maqedoninë është një ngjarje e përsëritur, pavarësisht takimeve të zhvilluara mes përfaqësuesve të ministrive të Bujqësisë të të dyja vendeve.
/tesheshi.com/
