Tensioni mes refugjatëve dhe forcave policore në kufirin mes Greqisë dhe Maqedonisë ka kulmuar sot me vdekjen e një të riu maroken, i cili humbi jetën nga prekja aksidentale e kabllove elektrikë.
Marokeni gjendej mes personave të bllokuar në anën greke të kufirit, në Idomeni, që po kërkojnë të kalojnë në pjesën maqedonase për të vijuar më pas udhëtimin drejt vendeve të zhvilluara europiane.
Refugjatët, përgjithësisht nga Maroku, Irani e Pakistani, po përplasen prej dy ditësh me policinë, e cila nuk lejon kalimin e tyre.
Sipas policisë, marokeni preku kabllot elektrikë pasi u hodh nga një vagon treni. Protestuesit nuk i lejuan ambulancat që ta merrnin trupin e refugjatit.
Incidenti i sotëm është i dyti pas atij të së shtunës, kur një tjetër refugjat, që mendohet të jetë po nga Maroku, humbi jetën gati në të njëjtën mënyrë.
Gjendja në kufirin mes Greqisë dhe Maqedonisë u përkeqësua kur u vendos vetëm për kalimin e refugjatëve nga Siria, Iraku dhe Afganistani.
Një pjesë e refugjatëve të tjerë, të vlerësuar si emigrantë ekonomikë, bllokuan dje kalimin kufitar, duke thirrur, “Po nuk kaluam ne, nuk kalon askush.”
Zyrtarët grekë të politikave të emigracionit kanë deklaruar se situata në Idomeni do të gjejë zgjidhje brenda katër apo pesë ditëve të ardhshme, por pa dhënë hollësira të mëtejshme. /tesheshi.com/
