Përshkallëzimi i situatës me refugjatët në kufirin e Maqedonisë ka bërë që BE dhe OKB tëë ndjekin nga afër sjelljen e autoriteteve, ndërsa në vend është shpallur gjendja e krizës që lejon Ushtrinë të ndërhyjë. BE thotë se po vëzhgon ecurinë e krizës, ndërsa Agjencia për Refugjatët e Kombeve të Bashkuara kritikoi Shkupin për mbyllje të kufirit me Greqinë.
“Këta janë refugjatë në kërkim të mbrojtjes dhe nuk duhet të ndalohen”, ka thënë zëdhënësja e UNHCR-së, Melissa Fleming.
Mijëra njerëz nga Lindja e Mesme, Azia dhe Afrika, kryesisht refugjatë sirianë, janë bllokuar që të enjten në zonën kufitare midis Maqedonisë dhe Greqisë, në pritje të kalimit.
Policia maqedonase përdori edhe gazin lotsjellës kundër refugjatëve që u përpoqën të hyjnë në territorin e Maqedonisë.
UNHCR shprehet thellësisht e shqetësuar për fatin e refugjatëve që janë bllokuar, si shprehet, “në tokën e askujt”, duke bërë thirrje që autoritetet të tregojnë vetëpërmbajtje dhe të japin ndihmë humanitare. /tesheshi.com/
