Kryeministri Edi Rama, kreu i Partisë Demokratike Lulzim Basha dhe ai i Lëvizjes Socialiste për Integrim, Ilir Meta u bënë bashkë sot, në tryezën e thirrur nga Koalicioni i Vëzhguesve Vendorë në lidhje me reformën zgjedhore.
Në fjalën e tij, kryeministri Rama ka deklaruar se ka ardhur koha që Shqipëria të shkëputet nga historiku i zgjedhjeve të deformuara dhe jotransparente.
Ai ka vlerësuar se, problemet e konstatuara gjatë proceseve zgjedhore kanë ardhur duke u tkurrur, por vazhdojnë të jenë të pranishme në çdo zgjedhje.
Ndër të tjera, kreu i qeverisë e vuri theksin tek konsensusi, të cilin e cilësoi si të domosdoshëm, ndërsa për reformën u shpreh se do të sillte shumë gjëra pozitive.
“Reforma e re zgjedhore do të sillte shumë gjëra pozitive nëse do të kishte konsensus për të. Konsensusi është i domosdoshëm pasi nuk mund t’i privohet asnjë pale mundësia që të hyjë në lojë me rregulla të barabarta”, ka thënë Rama.
Kryeministri nënvizoi domosdoshmërinë për të adresuar edhe çështjen e korrupsionit zgjedhor, për të cilin tha se krahasuar me të shkuarën është tkurrur në mënyrë të ndjeshme, por tha se mbetet një shqetësim në zonat më të varfra dhe sidomos në rastet kur prevalon një mendësi tradicionale e fisit apo e klanit.
Ai shprehu bindjen se reforma territoriale- administrative ka dhënë një bazë solide edhe për të pasur një proces zgjedhor më të mirë./tesheshi.com/
