Operacioni Ndërkombëtarë i Monitorimit nuk ka asnjë dyshim se Vetting-u, do të pastrojë sistemin e drejtësisë shqiptare nga gjyqtarë dhe prokurorë të korruptuar.
“Ne besojmë se puna në kuadër të procesit të Vetting-ut do të jetë tërësore dhe më në fund do të mundësojë pastrimin e sistemit të drejtësisë, nga ata të cilët nuk do të shërbejnë në interes të qytetarëve shqiptarë, por që kanë ndjekur praktika korruptive dhe/ose kanë pasur lidhje me rrjetet e krimit të organizuar.
Përtej punës së Vetting-ut, zbatimi i reformës gjithëpërfshirëse të drejtësisë, ka vendosur themelet për të konsoliduar një sistem gjyqësor më efikas. Prandaj është në detyrë të organeve përkatëse të sigurojnë, sa herë që është e nevojshme, që hetimet efektive kundër krimit dhe lufta kundër korrupsionit, të kryhet në të gjitha nivelet”, tha për Vizion+, zyra e ONM.
Ligji i Vetting-ut, ka hasur sipas faktorëve ndërkombëtarë të përfshirë në procesin e hartimit të tij, në oponencën e segmenteve të ndryshme, me qëllim për ta penguar atë.
Zyra e ONM, rithekson se edhe nëse do të ketë përpjekje për bllokim, situatat do te tejkalohen.
“Zonja Calavera është shprehur se është normale që në rastet e reformave të ndërlikuara ekzistojnë disa rreziqe, një pjesë mund të parashikohen dhe të parandalohen, ndërkohë që të tjera mund të zbuten. Kjo ishte një konsideratë e përgjithshme. Zonja Calavera pati mundësinë të përcillte një inkurajim të përgjithshëm, të gjithë aktorëve të përfshirë në Shqipëri, duke theksuar se nëse bllokime të paparashikuara do të ndodhin gjatë rrugës së zbatimit, ato mund të tejkalohen përmes kurajos dhe përkushtimit”, thuhet në reagimin e zyrës.
Në muajin korrik, Gjykata Kushtetuese vendosi të shtyjë për në 28 shtator shqyrtimin e padisë së gjyqtarëve kundër Vetting-ut, të cilët ankimuan nenet që kanë lidhje të drejtpërdrejtë me ta. ONM thotë se nuk ka asnjë koment për këtë çështje, pasi procesi është ende në zhvillim. /tesheshi.com/
