Veç makabritetit, lajm-videot e ekzekutimeve të ISISI-it, të ashtëquajturit Shtet Islamik të Shamit dhe Levantit, shoqërohen dhe një çudi e paparë, siç është spektakli i figurës. Gjykuar nga ajo, duket se nuk ke të bësh me vrasës të pashpirt, por dhe me individë profesionistë në fushën e imazhit; ose a thua se kur vendosin të ekzekutojnë, pajtojnë ndonjë kompani filmike me emër për të realizuar xhirimet. Por këtu lind një pikëpyetje tjetër se si ja bëjnë ata kameramanë që ndërsa xhirojnë prerje kokash, të mund të durojnë pa u zënë gjaku?! Sipas një lajmi të fundit, televizioni amerikan FoxNews ka konkluduar me ndihmën e ca ekspertëve se pamjet e ekzekutimit të 21 të krishterëve koptë, nuk janë të vërteta. Dhe në fakt, pa qenë nevoja fare për ekspertë, por thjesht më sy të lirë e me pak njohuri mbi teknikat e imazhit, e kupton që ajo video ka ca detaje që e bëjnë të çuditshme, në mos të pabesueshme. Mjaft të thuhet se për xhirimet e atyshme, veç një stafi përmbi 10 personash, është përdorur ‘krane’ e ‘karel’, lukse të teknologjisë vizuale që nuk i rrok logjika se si mund të përfundojnë në duart e ISIS-it, ose të përdoren prej tyre. E ndërkohë që lajmet me ISIS-in kanë zënë një goxha vend në media, kjo nuk e ka fashitur aspak misterin e madh karshi të tyre, sidomos kur është fjala për video ekzekutimesh, aq sa të duket sikur kemi të bëjmë me ndonjë kompani filmike profesioniste, që kanë vendosur të shndërrohen sakaq në vrasës mizorë. Dhe ky duhet të ishte lajm tek video e ekzekutimit të 21 koptëve: spektakli i papërligjur i mazhit! /tesheshi.com/
