Ndonëse mbledhja e kryesisë qendrore të BDI-së, ku po diskutohet vendimi përfundimtar nëse do të bëhet koalicion me VMRO-DPMNE-në ose jo ende nuk ka përfunduar, tre nënkryetarët e kësaj partie, Nevzat Bejta, Izet Mexhiti dhe Teuta Arifi, tani më e kanë lëshuar selinë në Reçicë të vogël.
Në momente kur nëpër media filluan të qarkullojnë thashetheme të ndryshme, se nënkryetarët Bejta, Mexhiti dhe Arifi kanë braktisur mbledhjen si rezultat i pakënaqësive të tyre ndaj vendimit të kryetarit të partisë, Ali Ahmetit dhe disa funksionarëve tjerë që të shkojnë në koalicion me VMRO-në, ishte i menjëhershëm reagimi i zëdhënësit të partisë, Bujar Osmani.
Sipas tij, nënkryetarët e lartpërmendur nuk e kanë lëshuar mbledhjen për shkak të mospajtimeve në parti, por siç tha ai, janë nevoja njerëzore për shkak të kohëzgjatjes së mbledhjes.
Ai në ndërkohë ka bërë të ditur se kryetari i partisë, Ali Ahmeti ka vendosur që gjuha shqipe do të mbetet pika e panegociueshme për këtë parti, duke mos lënë anash Specialen dhe vendimarrjen konsesuale.
I pyetur se a do të arrijnë që sonte të sjellin vendim përfundimtar, Osmani theksoi se tashmë çështja nuk është tek BDI-ja, por tek ata që do të duhet t’i pranojnë kushtet e tyre. M.Krasniqi – /tesheshi.com/
