Letra e Donald Lu-së për 140 deputetët për të votuar reformën për drejtësi, edhe pa kompromis politik, duket se përbën goditjen finale të qeverisë së Shteteve të Bashkuara të Amerikës, përpara se në Tiranë të vijë të dielën zyrtarja e lartë e Departamentit Amerikan të Shtetit, Victoria Nuland.
Numri tre i diplomacisë amerikane është zyrtarja që ka marrëdhënie më të mira personale me Lulzim Bashën në hirearkinë e lartë të Uashingtonit.
Ajo do të ketë takimin e fundit të lartë përpara se të votohet reforma në drejtësi, më 21 korrik. Si diplomate që është, zonja Nuland padyshim që do të ketë një ofertë tjetër për Lulzim Bashën, që lideri i opozitës të dalë nga qerthulli i “JO”-së për reformën.
Dhe burime diplomatike bënë të ditur për tesheshi.com, se këto orë negociatash frenetike është arritur një formulë, e cila do të diskutohet ditën e dielë, më 10 korrik.
Por gjithçka varet nga qëndrimi i ish-kryeministrit Berisha, i cili ka bojkotuar edhe fizikisht praninë e ambasadorit amerikan në grupin parlamentar të PD-së.
Ndaj, letra e dërguar tek deputetët, përfaqëson një qëndrim të pastër politik se “janë qepur punët në Kuvend”. Që do të thotë se janë gjetur votat për ta miratuar reformën edhe me kundërshtimin e PD-së.
Ambasadori Donald Lu e ka demonstruar këtë në disa takime publike me disa deputetët të PD-së që janë të mënjanuar nga Basha, si Astrit Patozi, Majlinda Bregu, Eduard Selami etj.
Por teksti i letrës, përveç sigurisë që ka SHBA shpreh edhe një dramacitet të qartë më shumë politik se diplomatik.
Që do të thotë se pikërisht qëndrimi ndaj kësaj reforme shpreh se kush është pro aleancës së SHBA-së me Shqipërinë dhe kush jo.
Letra e diplomatit amerikan këtë gjë e shpreh që në fillim.
“Të nderuar deputetë të Kuvendit, Shtetet e Bashkuara kanë qenë dhe do të jenë gjithmonë aleati juaj strategjik në mbrojtje të sovranitetit të Shqipërisë dhe të demokracisë shqiptare. Sot, korrupsioni dhe ndikimi politik në sistemin tuaj të drejtësisë kërcënojnë shëndetin e shoqërisë tuaj dhe dobësojnë aleancën tonë. Si aleat i NATO-s, është në interesin kombëtar të Shteteve të Bashkuara që Shqipëria të mbetet një demokraci e fortë dhe e sigurtë”, fillon letra e ambasadorit.
Ndërkaq, po pa dorashka, Donald Lu rrëzon dy argumentet e ngritura si nga LSI ashtu edhe nga PD-ja për çështje juridike të draftit, duke e konsideruar të gjithë materialin si një project që i gjithi pa ndryshime ka mbështetjen amerikane.
“Në fakt, ka një sërë sistemesh proporcionale, përfshirë votën e vetme të transferueshme, votimin e balotazhit të menjëhershëm, votimin e shumëfishtë, eliminimin dhe votimin Kondorse. Secili prej këtyre sistemeve proporcionale do të ishte në përputhje me Komisionin e Venecias.
Shtetet e Bashkuara dhe Bashkimi Evropian i kanë kundërshtuar vendet e rezervuara sepse kjo formulë do t’i etiketonte menjëherë anëtarët e komisionit të vetingut ose pro qeverisë, ose pro opozitës. Vetingu ka për qëllim të kthejë besimin në gjyqësor duke larguar manipulimet partiake. Ndikimi i qartë politik sugjeron se modeli i vendeve të rezervuara do ta minonte këtë besim. Kemi vazhduar ta nxisim si qeverinë ashtu dhe opozitën të gjejnë një kompromis që është në përputhje me opinionin përfundimtar të Komisionit të Venecias dhe që do të shmangte etiketimin politik të anëtarëve të komisionit të vetingut”, theksohet më tej në letër.
Ndërsa fundi i saj është dramatik dhe shpreh një ndarje drastike të qëndrimit me ata që do të jenë kundër:
“Ka ende kohë që udhëheqësit politikë të gjejnë një kompromis që të mund të mbështetet si nga opozita ashtu edhe nga mazhoranca. Duhet ta mbështesim të gjithë këtë kompromis. Megjithatë, nëse udhëheqësit politikë nuk e duan kompromisin dhe nuk bien dakord për një tekst të përbashkët, ju bëjmë thirrje që ju ta votoni reformën. Paragrafi 87 i raportit të Komisionit të Venecias thotë se projekti i tanishëm i reformës është një propozim koherent e i shëndoshë dhe se është në përputhje me standardet europiane.
Shtetet e Bashkuara besojnë se kjo reformë është jetike për të ardhmen e vendit tuaj. Ju bëjmë thirrje që më 21 korrik të votoni pro reformës në drejtësi”.
Në gjuhën politike, letra e Lu-së mund të konsiderohet si “kërbaçi” përpara “kulaçit” që pritet të ofrojë Victoria Nuland.
SHBA preferon zgjidhjen me Bashën në tavë për të mos e faktorizuar më shumë se duhet Ilir Metën, por i ashtuquajturi Plani B padyshim që është bërë dhe i qepur, pasi nuk mundet që një shtet si SHBA të dështojë në një ndërmarrje ku ka investuar miliona usd siç është reforma në drejtësi. Por ekziston edhe një Plan C, i cili mund të vihet në zbatim nëse dështojnë dy të parë më 26 Gusht kur Tiranën do ta vizitojë Zv/presidenti i SHBA-së, Joe Biden.
Kudo të shkojë, gjërat tashmë janë qartësuar shumë dhe pas 21 korrikut politika shqiptare nuk do të jetë aspak si kjo e sotmja.
Më e pakta me dy-tre “tiranosaurius- rex” që mund të bien…
/tesheshi.com/
