Brukseli dhe çdo kryeqytet në Evropën Perëndimore duhet të kuptojnë se së shpejti do të jetë e vështirë të flitet për sigurinë në Evropë pa integrimin e Ballkanit Perëndimor në Bashkimin Evropian, deklaroi ministri i Jashtëm hungarez Peter Szijjarto, pas samitit BE-Ballkani Perëndimor.
Ai në profilin e tij në Facebook ka thënë se vendimet e Këshillit Evropian të marra të enjten kanë shkaktuar zhgënjim në disa vende që aspirojnë anëtarësimin në BE.
Ai shtoi se Hungaria, si një fqinj i Ballkanit Perëndimor, ishte “plotësisht i vetëdijshëm për rëndësinë e stabilitetit të rajonit” dhe se do të ishte “mirë ta kuptojmë këtë edhe në Evropën Perëndimore”.
Ai gjithashtu shprehu keqardhjen që Gjeorgjisë nuk i ishte dhënë statusi i kandidatit në BE.
“Mendojmë se vendi ka zbatuar të gjitha masat e nevojshme për kandidimin. Gjeorgjia dhe liderët e saj janë të përkushtuar për t’u bashkuar dhe ne nuk mund ta kuptojmë pse u mor një vendim kaq dekurajues,” shkroi Szijjarto, duke shtuar se ai do të shkonte në Gjeorgji për të “konfirmuar mbështetjen për integrimin e miqve gjeorgjianë në BE”.
Ky qëndrim vjen nga një vend m e nuanca rebeli ndaj BE-së, si anëtar i saj, që nga ana tjetër ngre alarmin për atë që e sheh si islamizim të kontinentit prej lejimit të valës së refugjatëve nga Lindja. /tesheshi.com/
