Kryetari i lëvizjes Vetëvendosje Visar Ymeri ka reaguar pas deklaratave të peshkopit të Manastirit të Deçanit, Sava Janjiq i cili i ka quajtura aktivistët e kësaj lëvizje neo-nazistë.
Ai ka thënë se gjuha e përdorur së fundmi nga një udhëheqës fetar në Kosovë, z. Sava Janjiq, është e papranueshme. Në komunikimin me zv. Ministrin P. Selimi, z. Janjiq shprehet për Lëvizjen Vetëvendosje dhe për aktivistët e saj në një mënyrë ofenduese dhe përbuzëse duke na quajtur neo-nazistë.
“Gjuha e Sava Janjiq i bën jehonë në fakt gjuhës së vetë zv. Ministrit Selimi, i cili disa ditë më parë i ka quajtur aktivistët e Lëvizjes Vetëvendosje fashistë. Etiketime të tilla për ekstremizma të llojeve të ndryshme janë përdorur kundër Lëvizjes Vetëvendosje vetëm nga njerëzit pranë pushtetit në Kosovë për të vetmen arsye, sepse Lëvizja është i vetmi subjekt politik që nuk pranon “paqe pa drejtësi” dhe nuk pranon ‘stabilitet pa barazi’,” ka theksuar Ymeri.
Sa i përket Lëvizjes Vetëvendosje Ymeri ka thënë se ajo është një organizatë politike socialdemokrate që refuzon e lufton çdo veprim e qëndrim shoven, racist a fashizmi. Këtë e kemi të sanksionuar dhe në Statutin e organizatës tonë.
“Sava Janjiq dhe Petrit Selimi i akuzojnë shqiptarët për atë që kurrë s’kanë qenë. Janjiq-Selimi jo vetëm që përdorin të njëjtat terma për një Lëvizje të frymës çlirimtare e sovraniste siç është Vetëvendosje, por po kurdisin të njëjtën të ardhme për Kosovën, pasi interesat e tyre janë të ngjashme. E ardhmja për të cilën ata punojnë është e ardhmja e një Kosove, çelësat e stabilitetit të së cilës do të varen në Beograd. Është e ardhmja ku mungesa e zhvillimit ekonomik do të shihet si fatalitet i pakapërcyeshëm. Është e ardhmja ku shqiptarëve do t’u mbetet si mundësi vetëm mërgimi, dhe kjo e ardhme ngjan me të shkuarën,” ka deklaruar Ymeri.
Më tej Ymeri ka shtuar se Lëvizja Vetëvendosje është kundër një të ardhme të tillë, e cila bart në vetvete realizimin shpirtëror të Millosheviqit.
Ai po ashtu ka theksuar se ne do të punojmë me vetësakrifikim maksimal për një Kosovë sovrane e republikane ku të gjitha minoritetet do të mbrohen e do të garantohen me të gjitha të drejtat, sipas konventave ndërkombëtare.
Ne do të punojmë për një Kosovë ku serbët do të mund të jetojnë si të barabartë, e ku të gjitha fetë e institucionet fetare do të ruhen si në çdo vend të Evropës.
Por vetëm një Serbi që dënon fashizmin politikisht e shoqërisht, që e njeh Kosovën e që merr përsipër pasojat e krimeve të kryera, do të krijonte kushtet e pajtimit fqinjësor në të ardhmen, ka shkruar Ymeri në FB./tesheshi.com/
