Ambasadori amerikan, Greg Delawie, në një prononcim për mediat nga Kuvendi i Kosovës ka shprehur shqetësimin e tij për hedhjen e sërishme të gazit në Kuvend përkundër paralajmërimit të sekretarit të shtetit, John Kerry, që kjo gjë të mos ndodh më.
“Para pak ditësh dëgjuam komentet e Kerry-t sa i përket gazit në Kuvend. Njerëzit nuk janë duke e dëgjuar atë”, tha Delawie, duke shtuar se ai çmon deputetët po kryejnë detyrat konform rregullave parlamentare.
Delawie po ashtu u shpreh i shqetësuar intensifikimin e retorikës nacionaliste së fundmi.
Sipas tij, qytetarët e Kosovës janë të interesuar të ketë sa më shumë diskutime për problemet e ngecjeve ekonomike, duke lënë të nënkuptohet se gazi lotsjellës nuk është zgjidhja.
“Pengimi i punës së Kuvendit nuk ndihmon aspak. Ajo çfarë në Kosovë presin është që të ketë diskutim për ekonominë”, tha Delawie.
Ambasadori amerikan po ashtu shprehu zhgënjimin e tij për thyerjen e masës “arrest shtëpiak”, nga dy deputetët e opozitës Faton Topalli e Fisnik Ismajli. /tesheshi.com/
