Ministria e Punëve të Jashtme të Greqisë tha se presidentja e re e Maqedonisë së Veriut, Gordana Siljanovska-Davkova, “ka shkelur rëndë Marrëveshjen e Prespës” nga viti 2018 për ndryshimin e emrit të Maqedonisë së Veriut, sepse ka lënë pa thënë prapashtesën “e Veriut” në aktin e betimit, gjë që solli dhe reagimin e BE-së.
Silijanovska-Davkova e quajti vendin e saj vetëm “Maqedoni” dhe nuk iu bind kryetarit të Kuvendit në largim, Jovan Mitreski, i cili kërkonte ripërsëritje më shpresën se presidentja e re do thoshte “Maqedonia e Veriut”.
Për diplomacinë greke, Siljanovska-Davkova “ka shkelur në mënyrë flagrante” jo vetëm marrëveshjen me Greqinë, por edhe Kushtetutën e Maqedonisë së Veriut, e cila zyrtarisht e ka prezantuar këtë emër.
Në shenjë proteste, ambasadorja e Greqisë në Maqedoninë e Veriut, Sofija Philippidou u largua nga ceremonia në Shkup.
Në një deklaratë, Athina paralajmëron se “marrëdhëniet dypalëshe, si dhe rruga evropiane e Maqedonisë së Veriut, varen nga zbatimi i plotë i Marrëveshjes së Prespës dhe, mbi të gjitha, nga përdorimi i emrit kushtetues të atij vendi”.
Në Athinë, partitë dhe mediat greke po bëjnë vlerësime të ashpra për aktin e Siljanovska-Davkovas, me kritika ndaj qeverisë greke se nuk ka reaguar më rreptësisht.
Marrëveshja historike me Greqinë
Në vitin 2018, Shkupi përfundoi një marrëveshje “historike” me Greqinë, si pjesë e së cilës u pajtua që emrit të vendit t’i shtohej tipari gjeografik “Veriu”, për t’i dhënë fund një mosmarrëveshjeje të gjatë me shtetin fqinj, i cili bllokoi anëtarësimi i saj në NATO për shkak të kësaj, si dhe negociatat e anëtarësimit me Bashkimin Evropian.
Vendi u bë anëtar i NATO-s në vitin 2020, por marrëveshja me Greqinë u kundërshtua nga partia nacionaliste e djathtë VMRO-DMPNE, kandidatja e së cilës Siljanovska-Davkova fitoi zgjedhjet për president, duke u bërë e para grua në krye të shtetit maqedonas, që nga pavarësia në ‘91-shin.
Për shkak të kthimit në pushtet të opozitës së djathtë në këtë shtet të varfër ballkanik me 1.8 milionë banorë, ekziston rreziku i ringjalljes së tensioneve me Greqinë, por edhe me Bullgarinë, e cila vendos kushtet e veta për përparimin e anëtarësimit të Maqedonisë së Veriut në BE. /tesheshi.com/
