Lulzim Basha, në pozitën e vështirë të një vulëhumburi të PD-së, ka vendosur të mos e komentojë vendimin e gjykatës e cila ia kaloi atë grupimit Berisha.
Në të parin reagim pas një verdikti drejtësie që e godet rëndë politikisht, ai tha:
“Nuk komentoj vendimin e gjykatave, ky është një standard i imi, i yni si PD për të cilin kemi thënë që do t’i përmbahemi edhe në rastin e vendimit të Gjykatës së Apelit.
Ajo që dua t’u them demokratëve që janë mërzitur me këtë vendim, pasi prisnin një vendim tjetër, ju them që të mos mërziten, të mos dëshpërohen, sepse në fund të fundit këtë betejë as nuk e kemi nisur e as e vazhdojmë për logo, për vulë, apo për karrige. Jemi bërë bashkë për një betejë më të madhe. Kjo është një betejë shpirtrash të bashkuar për idealet e Dhjetorit. Ne do të bëjmë gjithçka që kemi në dorë që të mos shpërdorojmë këtë besim shpirtrash, të qindra mijëra njerëzve. Do të vazhdojmë betejën tonë për një Shqipëri më të mirë.”
I pyetur se si ndihet tani që nuk gëzon më postin e kryetarit të PD-së dhe është vetëm një deputet, Basha u përgjigj:
“Nuk e kam ndjerë veten ndryshe prej titujve dhe ofiqeve. Kam qenë Lulzim Basha para se të hyja në politikë, jam Lulzim Basha sot dhe do të jem në çfarëdo pozite tjetër. Ajo që më lidh me njerëzit nuk është titulli, ofiqi apo logoja, por është përkushtimi për një Shqipëri më të mirë që meriton më shumë.” /tesheshi.com/
