Tarifat amerikane janë “një goditje e rëndë” për ekonominë botërore dhe Bashkimi Evropian po përgatit kundërmasa nëse negociatat dështojnë, tha presidentja e Komisionit Evropian Ursula von der Leyen.
“Ne po finalizojmë tashmë paketën e parë të kundërmasave në përgjigje të tarifave të çelikut,” tha ajo në një deklaratë të lexuar në Samarkand, Uzbekistan, përpara një samiti të partneritetit BE-Azinë Qendrore.
“Ne po përgatisim kundërmasa të reja për të mbrojtur interesat tona dhe kompanitë tona, nëse negociatat dështojnë“, përfundoi ajo.
Von der Leyen thotë se pasojat e tarifave amerikane do të jenë “të mëdha”.
“Ekonomia globale do të pësojë dëme të mëdha, pasiguria do të rritet dhe proteksionizmi i mëtejshëm do të inkurajohet. Pasojat do të jenë të tmerrshme për miliona njerëz në mbarë botën, veçanërisht për vendet më të cenueshme që tani janë subjekt i tarifave më të larta të SHBA”, tha von der Leyen.
“Të gjithë do të vuajnë”
Në një konferencë për shtyp, ajo shtoi se të gjitha kompanitë “të mëdha dhe të vogla” do të vuajnë “që nga dita e parë”, të prekura nga ndërprerjet e zinxhirit të furnizimit, pasiguria më e madhe dhe “burokracia e rëndë”.
“Kostoja e të bërit biznes me Shtetet e Bashkuara do të rritet në mënyrë dramatike,” tha ajo.
“Për më tepër, duket se nuk ka rregull në këtë rrëmujë. Nuk ka asnjë rrugë të qartë përmes kompleksitetit dhe kaosit që prek të gjithë partnerët tregtarë të SHBA,” vuri në dukje von der Leyen.
Kujtojmë, Trump njoftoi një tarifë minimale prej 10% për shumicën e mallrave të importuara në Shtetet e Bashkuara, me një normë më të lartë prej 20% për Bashkimin Evropian, duke intensifikuar më tej luftën tregtare globale që kërcënon të rrisë inflacionin dhe të ngadalësojë rritjen ekonomike në SHBA dhe në mbarë botën. /tesheshi.com/
