Ambasada ruse në Tiranë ka reaguar mbi një deklaratë të djeshme të Ministrisë së Jashtme të Shqipërisë, të publikuar në përfundim të takimit mes ambasadorit Alexander Karpushin dhe Drejtorit të Drejtorisë së Përgjithshme të Marrëdhënieve Dypalëshe, Sokol Gjoka.
“E konsiderojmë të papranueshëm shtrembërimin e thelbit dhe të karakterit të bisedës së Ambasadorit rus me përfaqësuesin e MPJ-së së Shqipërisë. Toni i deklaratës zyrtare të Ministrisë nuk pasqyron aspak frymën e takimit, i cili u zhvillua në një atmosferë miqësore.
Në deklaratë nuk përmendet dialogu konstruktiv mes palëve mbi çështjet dhe perspektivat e marrëdhënieve ruso-shqiptare, të cilave iu kushtua pjesa më e madhe e bisedës.
Është e rëndësishme të vihet re se qëndrimet e Rusisë dhe Shqipërisë ndaj çështjes së Kosovës nuk u trajtuan fare nga bashkëbiseduesit.
Do t’u rekomandonim autorëve të deklaratës të njihen me kuptimin e fjalës “shantazh” dhe të shmangin në të ardhmen përdorimin e saj të papërgjegjshëm dhe jokorrekt në deklarata zyrtare të dikasterit të politikës së jashtme”, thuhet në reagimin e ambasadës ruse.
Ditë më parë, Moska reagoi pas një lajmi të autoriteve maqedonase sipas së cilave një postë policore në kufi me Kosovën ishte sulmuar nga shqiptarë me uniforma UÇK-je. Dhe për këtë, Moska zyrtare akuzoi Shqipërinë dhe Kosovën, që sipas saj po lejojnë akte të tilla. më pas, ky qëndrim solli reagimin e palës shqiptare, e cila thërriti edhe ambasadorin e Rusisë në Tiranë. Këto zhvillime pasojnë dhe deklarimet e ditëve më të kryeministrit Rama që tha se Europa duhet të bëj çmos për t`I vënë fre Rusisë. /tesheshi.com/
