Tanimë një 39-vjeçar, i tërhequr nga futbolli i luajtur, një prej lojtarëve më të njohur të Realit të Madridit, kapiten për vite të tëra, Raul Gonzales Blanco do të kthehet sërisht në “Bernabeu”.
Shtatë vite më parë ai do t’i jepte fund karrierës te Reali, për të cilin kishte shënuar një mal me gola, për të luajtur më pas për periudha të shkurtëra në Gjermani, në Katar e në SHBA.
Nënshkrimi i një kontrate këto ditë do ta bëjë Raul-in këshilltar presidencial në klubin madrilen. Një detyrë që ai do ta nisë më 1 korrik, e që parashikon këshillimin e presidentit për çka ngjet te Reali.
Siç nënvizon Marca, edhe pse pozicioni nuk është i përcaktuar qartësisht, Raul do të bëjë të njëjtën rrugë nga ka kaluar më parë dhe Zinedine Zidane, i rikthyer po ashtu përmes së njëjtës detyrë, për të përfunduar si trajner i Realit të Madridit.
Raul do t’i refuzonte më herët ftesat e presidentit Perez për t’u kthyer e për të kontribuar për Realin, duke i justifikuar me momentin jo të përshtatshëm. /tesheshi.com/
