Lidhja Socialdemokrate e Maqedonisë ka publikuar biseda të përgjimeve që dëshmojnë se rasti i Sopotit mund të ketë qenë i montuar, pasi kanë munguar prova, ndërsa deklarata e dëshmitarit kyç për rastin është marrë me dhunë.
Kjo dëgjohet në audio bisedën që pretendohet të jetë mes ministres së Brendshme Gordana Jankullovska dhe shefit të drejtorisë për kundërzbulim Sasho Mijallkov.
Pavarësisht kësaj, ata nuk brengosen për faktin se njerëz të pafajshëm vuajnë burgun, por mundohen të përfitojnë nga situata, pasi më herët, ministri i drejtësisë Blerim Bexheti kishte kërkuar të zgjidhin rastin.
Sasho Mijallkov: “Blerimi më kërkoi favore në gjyqësor për më shumë lëndë, midis tjerash edhe për Sopotin. Më trego tash, a u morëm vesh për diç konkrete. A nënshkruam diçka?
Gordana Jankullovska: Në mënyrë precize nuk jemi marr vesh. Shihe ti, vlerësoje situatën, çka sjellë kjo në anën tonë të peshores. Ata u qelbën në burg”, thotë Jankullovska.
“Këta tanët e kanë zgjidhur me dajak” dëgjohet përgjigja që sipas LSDM-së është i shefit të DSK-së, Sasho Mijallkov.
Jankullovska pranon se ministria e Brendshme nuk ka kurrfarë dokumentacioni për rastin, ndërsa në bisedë duke folur për kërkesat e BDI-së, që njerëzit e pafajshëm të mos qëndrojnë në burg, bëjnë kalkulime se si të zgjidhin këtë kërkesë të BDI-së, por insistojnë që të dënuarit të falen dhe jo të shpallen të pafajshëm pasi në atë rast mund të kërkojnë dëmshpërblim dhe të njollosin gjyqësorin.
“Ata (BDI) nuk e kanë dertin e shqiptarëve nëpër burgje pasi ato janë të mbushura me shqiptarë. Ata kanë qëllimin e poentimit politik”, thotë zëri i cili pretendohet të jetë i Jankullovskës.
Rasti i Sopotit, ka të bëjë me autoblindën e NATO-s, e cila në vitin 2003 shkeli në minë, incident në të cilin humbën jetën dy ushtarë polak dhe një përkthyes. U fajësuan 13 banorë vendas vetëm me dëshminë e Ramadan Bajrmait, të cilin e detyruan ta nënshkruante letrën në të cilën pranohej fajësia. Sopotasit u dënuan me 156 vjet burg. Dënimin e vuajtën 5 banorë./tesheshi.com/
